«Үзегез белән генератор йөртегез инде». Сөмбел Билалова концертында ут беткән

Сөмбел Билалова тере тавышка җырлаган видео куйган.

«Кичә шундый хәл булды бит әле… Әтнәнең ике авылында концерт куйдык. Тик менә көндезгесе бик үзенчәлекле булды. Концерт башланды һәм 10 минуттан ут сүнде! Бөтен авылда, хәтта берничә күрше авылда да ут бетте! Андый хәлләр була иде, тик утны гадәттә берничә минуттан бирәләр иде. Ә кичә юк. Нишләргә? Җырларга!» — дип язган Сөмбел Билалова.

«Әле ярый баянчы Айзат булды! Казан филармониясе артистлары белән сәгать ярым тере тавышка, баянга микрофонсыз җырлап концерт куйдык. Беләсезме, тамашачыларга бу бик тә ошады, безнең үзебезгә дә. Карагыз әле, үзләре дә ничек матур итеп, бер хор булып җырладылар минем белән! Мондый концерт күргән юк иде дип, рәхмәтләр әйтеп киттеләр. Мин хәтта уйлап та куйдым әле, әллә юри шулай эшләгәннәр инде. Концерт беткәч, утны бирделәр. Менә шулай», — дип хис-кичерешләре белән уртаклашкан җырчы.

Сөмбелнең тере тавышка җырлавын виртуаль дуслары хуплап алган.

«Молодец! Матур җырладың, минем әнинең яраткан җыры»;

«Менә бит, булдыргансың, Сөмбел, тавышың да, үзең дә бик матур»;

«Молодцы, ут юк дип җырламыйча китмәгәнсез»;

«Югалып калмаганыгыз һәм җыелган халыкның күңелен төшермәгәнегез өчен зур рәхмәт! Артист кеше бар кыенлыкларга да әзер булырга тиеш»;

«Молодцы, җырлап чыккансыз, фонограмма түгел бит»;

«Молодцы, тамашачыларга бәхет елмайган. Хәзер төшкә дә керми андый концерт», - дип мактаган җырчыны виртуаль дуслары.

«Илһам абый, Әлфия апа гомер буе баян белән җырлый иде».

«Аны сынар өчен бетерәләр»;

«Ярый баянчы бар»;

«Тавышсыз җырчылар нишләр иде икән бу чакта?» — дип комментарийлар калдырган инстачыларның бер өлеше.

«Үзегез белән генератор йөртегез инде», - дип киңәш биргән берсе.