Гүзәл Уразова тәҗрибәле бакчачылардан киңәш сорый

Җырчы ире утырткан алмагачтан алма авыз итеп караган видеосын куйган.

Татарстанның халык артисты Гүзәл Уразова кызыклы видео куйган. «Илдар алмагач утырттым дигән була. Әчелеге…

Сезнең арада бакча караучылар күп бит, берәр киңәш берегез әле, зинһар, газондагы чүп белән ничек көрәшәсез? Бер кат йолкып чыктык, ун көндә тагын да зуррак булып үсеп чыкканнар», — дип тә язган ул.

Видеода Гүзәл алмагачтагы кып-кызыл, әмма вак алмаларны тотып карый.

«Нәрсә утырттың син, җаным? Мондый алмагач утыртмыйлар бит инде», — ди ул.

Илдар ашап карарга тәкъдим итә. Гүзәлнең алманы кабуы була, авызын бөрештереп тә ала.

«Бәлки өлгермәгәндер», — дип аптырый Илдар.

«Ничек өлгермәсен, кып-кызыл булып утыра бит», — ди Гүзәл.

«Детокс», — дип шаярта Илдар.

«Әллә декоратив алма инде», — ди аптыраган Гүзәл.

«Минем бар шундый декоратив алма, тик аның яфраклары да кызыл», — дип комментарий калдырган берәү.

Инстачылар бу алманың беренче кырау төшкәч тәмләнүен, шул алмадан бөтен килеш ясалган кайнатма бик тәмле булачагын да язганнар.