Зәмирә Рәҗәпованың кечкенә улы әбисен тәрбиячегә бүләк итмәкче булган | intertat.tatar

Зәмирә Рәҗәпованың кечкенә улы әбисен тәрбиячегә бүләк итмәкче булган

Бу турыда Данилның тәрбиячесе сөйләгән.

Зәмирә Рәҗәпова улы Данил белән тәрбияче сөйләшүен виртуаль дусларына тәкъдим иткән.

«Шушы көннәрдә Данилны балалар бакчасыннан алырга әбисе (кайнана) барды. Шул вакытта тәрбияче шаярырга булган.

Данил, синең әбиең нинди яхшы, сиңа машина алган, миңа да шундый әби кирәк.

Әйдәгез, мин сезгә аны бүләк итәм…

Уф, миңа әни алдында шулкадәр уңайсыз булды. Аннары Данилга: «Син нәрсә инде, улым, ул бит синең әбиең», — дип аңлатам.

Әни, әби яхшы. Тәрбияче апаныкы да булсын. Миңа жәл түгел, минем өйдә тагын берәү бар… (минем әни).

Менә нишләтим инде аны?» — дип язган ул.

Инстачыларның кәефен күтәргән бу хәл.

«Аяклы анекдот», «Әкият капчыгы», «Дөрес, бүлешә белергә кирәк», дигән комментарийлар калдырган «Әй язмыш, язмыш» тапшыруын алып баручының виртуаль дуслары.