«Ун ел көттереп килгән бәхет» — Мурат Гайсинның кызы туган

Кызы дөньяга килгәндә, җырчы үзе дә хатыны янәшәсендә булган.

Җырчы һәм популяр җырлар авторы Мурат Гайсинның кызы туган. Шатлыклы хәбәр белән артист инстаграм сәхифәсендә уртаклашты. 

«Ике сәгать элек кызыбыз туды, Аллаһка шөкер. Кызым туганда үзем дә бала тудыру йортында, хатыным янәшәсендә булдым. Тугыз ай эчендә бу яңалыкны беркемгә дә әйтмәдек. Шушы ун ел эчендә журналистлардан һәм башка кайберәүләрдән нинди генә мәгънәсез сораулар ишетмәдек. „Нишләп балагыз юк, әллә булышыйкмы?“, „Кемдә проблема: синдәме, хатындамы?“ дип сорадылар. Аллаһ кулында барысы да! Аллаһка шөкер! Кешеләр андый сораулар бирмәсеннәр иде. Балалары булмаган гаиләләргә сабырлык телим. Беркемне дә тыңламагыз, Аллаһы Тәгаләдән сорагыз. Барыгызга да бәхет телибез», — дип язган ул. 

Инстачылар һәм иҗатташ дуслары җырчыны гаиләсе ишәюе белән котлаганнар. Озын гомерле, бәхетле бала булсын, тигезлектә үстерегез, дип язганнар алар бәхетле әтигә.