Үз йортың ихатасында яулыксыз йөрергә ярыймы? (сорау-җавап)

“Йортыбыз ихатасына кайвакыт яулыксыз чыккалыйм. Кызым мине моның өчен шелтәли, сине чит ир-атлар күрергә мөмкин, ди. Бер хәзрәттән ишеткәнем бар, имеш, ихата ул - хатын-кызның өе, яулыксыз да йөрергә ярый. Бу хак сүзме?” - дип сорый укучыбыз. Сорауга җавапны Казанның Вахитов һәм Идел буе районнары имам-мөхтәсибе Йосыф хәзрәт Дәүләтшин бирә.
– Әссәләәмү галәйкүм үә рахмәтүллаһи үә бәракәәтүһ!Ханымның кызы дөрес әйтә. Мәсәлән, ихатаның коймасы биек булырга мөмкин яки өйләре кырда тору сәбәпле, ул ихатасына чыгып, әгәр дә бер ир-ат та күрми икән аны, йорергә мөмкин. Андый вакытта проблема юк. Чөнки бөтен хикмәт өйдә, ихатада булу түгел, ә ирләр күрмәүдә. Шуңа күрә, әгәр дә, ул ирләр күзеннән имин булса, яулыксыз йөрергә дә була. Ир-атлар күрергә мөмкин икән, андый вакытта өйдә дә яулыксыз йөри алмый.