Смартфон куллану кайсы органда яман шеш китереп чыгарырга мөмкин? | intertat.tatar

Смартфон куллану кайсы органда яман шеш китереп чыгарырга мөмкин?

Галимнәр фикеренчә, зәңгәр төс организмда мелатонин матдәсе барлыкка килүне тоткарлый.

Испания галимнәре урында яткан килеш смартфон кулланучы кешеләрнең яман шеш белән авыру ихтималы артуын ачыклаган. Аларда туры эчәк яман шеше килеп чыгарга мөмкин. Йоклар алдыннан гаджетлар куллану аеруча крукыныч. Бу турыда «Челнинские известия» сайты Медикфорумга сылтама белән хәбәр итте.

Галимнәр космик станциядән алынган белешмә буенча 2 мең кешене тикшергән. Бу станция шәһәрләрдә зәңгәр төс дәрәҗәсен дә тикшереп тора. Зәңгәр төс йогынтысы зур булган районнарда яшәүче кешеләрдә туры эчәк яман шеше барлыкка килү куркынычы 60 процентка арта.  Күпчелек очракта зәңгәр төс мобиль телефон, планшет, яктылык диодлы лапмалардан чыга. Галимнәр фикеренчә, зәңгәр төс организмда мелатонин матдәсе барлыкка килүне тоткарлый, мелатонинны исә йокы гормоны дип атыйлар.

Төнгә таба организмда мелатонин концентрациясе арта башлый, ул яхшы йоклау өчен ярдәм итә. Ә аның кимүе йокы начарлануга, көн белән төн ритмы бозылуга китерә. Әлеге хәл гормональ балансны боза, шулай итеп яман шеш барлыкка килү куркынычы арта, ди галимнәр.

«Колоректаль рак барлыкка килү төнге сменада эшләү белән бәйле», — ди белгечләр.