Быел ураза кайчан башлана, фитыр сәдакасы күпме бирәсе, Рамазан гаете ничәсе була?

Быел ураза кайчан башлана, фитыр сәдакасы күпме бирәсе, Рамазан гаете ничәсе була?
Татарстан Республикасы мөселманнары Диния нәзарәтенең Президиум утырышында Рамазан-шәриф аена әзерләнү һәм аны үткәрү тәртибе билгеләнде. Бу турыда Диния нәзарәте матбугат хезмәте хәбәр итте.

Президиум әгъзалары Рамазан аеның беренче көне итеп 6 майны билгеләделәр. Беренче тәравих намазы 5 май көнне ястү намазыннан соң укылачак. Утырышта катнашучылар - голәмәләр, казыйлар һәм мөхтәсибләр - тәравих намазын 20 рәкәгать итеп укырга кирәклеген ассызыклады. 

Ураза ае быел 29 көннән торачак һәм 2019 елның 4 июнь көнендә гает намазы укылачак. Гает намазының вакытын утырышта катнашучылар зур шәһәрләр өчен уртак бер вакыт - иртәнге  7.00 сәгатьтә билгеләргә тәкъдим итте, авылларда - кояш чыгып 30 минуттан соң яки мәхәллә халкының бергә килешеп сайланган вакытта уздырыла.

Быел фитыр сәдакасының минималь күләме былтыргы кебек - 100 сум, зәкят чыгаручыларга - 600 сум. Сәламәтлеккә бәйле рәвештә ураза тоту хәленнән килмәгән һәм аны башка вакытта каза кыла алмаучылар өчен һәрбер калдырылган көнгә фидиянең күләме – 200 сум. Зәкят түләү өчен нисаб күләме 230 мең сумны тәшкил итә, диелгән бу хәбәрдә.