Арендага алынган пай җире өчен түләмәсәләр нишләргә?

Күпвакытта пай җирен теге яки бу хуҗалыкка биргән милекче үз җире өчен аренда түләвен ала алмый. Хуҗалык җитәкчесе аңа акча да, салам-печән дә, ашлык та бирми. Бу очракта нишләргә?
Сорауга ТР авыл хуҗалыгы һәм азык-төлек министрлыгының җир һәм бүлек мөнәсәбәтләре бүлеге башлыгы Александр Дружин җавап бирә.

– Җир пае хуҗасы үз кишәрлеген кыска яки озак вакытлы срокка, авыл хуҗалыгы максатларында куллану өчен, крестьян (фермер) хуҗалыгы, инвесторлар яки хуҗалыкларга бирә ала. Арендага алучы һәм арендага бирүче арасында килешү төзелә. Анда уртак хокуклар, бурычлар, җир пае өчен түләү суммасы, аренда срогы һәм түләү шартлары күрсәтелә.
Әгәр таләпләр үтәлмәсә, пай милекчесе төзелгән килешүне вакытыннан алда өзү хокукына ия. Ике тапкыр килешенгән срокка арендатор түләүдән баш тартса, килешү өзелә. Шулай ук милекче үз хокукларын яклап, судка да мөрәҗәгать итә ала.