Татарстанда әти-әнисенең ишегалдына төшәргә маташкан парапланерист һәлак булган
46 яшьлек параплан белән идарәсен югалткан, парашют белән төшмәкче булган, тик ул ачылмаган.
28 июльдә Татарстандагы Татар Томбарлысы авылы янында парапланерист һәлак булган. Бу турыда Россия Тикшерү комитетының Татарстан буенча Тикшерү идарәсенең матбугат хезмәте хәбәр итте.
Ямал-Ненец автономияле округында яшәүче 46 яшьлек ир-ат парапланнан егылып төшә. Авыл янындагы кырга 50 метр биеклектән егылып төшкән кеше имгәнә. Берничә сәгатьтән ул хастаханәдә вафат була.
Тикшерү эшләре бара, диелә хәбәрдә.
Якынча версия буенча, ир-ат Татарстанга әти-әнисе янына килгән. Ул туганнарының ишегалдына параплан белән төшеп утырмакчы булган. Ләкин очкан чакта җил каты искән һәм ир-ат идарәсен югалткан. Ул парашют ярдәмендә төшмәкче булган. Кызганычка каршы, парашют ачылмаган, диелә хәбәрдә.