Унике яшьлек кыз эченнән итек кебек укмашкан чәч төене алганнар | intertat.tatar

Унике яшьлек кыз эченнән итек кебек укмашкан чәч төене алганнар

Бала эче авыртудан интегә, күңеле болгана, коса, аппетиты да югала.

Бурятия табиблары унике яшьлек кыз баланың эченә җыелган чәч төенен алган. Бу турыда Бурятиянең республика балалар клиник хастаханәсенең инстаграмдагы сәхифәсендә хәбәр ителә.

15 сантиметр озынлыктагы әлеге төен итек формасында булган.

Бала эче авыртып интегә. Аның күңеле болгана, коса, аппетиты да югала. Рентген аша карагач, баланың корсагында зур шеш булуы ачыклана.

Табиблар балага операция ясарга карар кыла. Кызның ашказаныннан «трихобезоар» — чәч һәм йон бөртекләре, ашказаны лайласы һәм согы белән бергә укмашып барлыкка килгән төенне алалар.

Балалар хирургы Зорьяна Цыренова сүзләренчә, ул әлегә кадәр мондый очракны күрмәгән булган.

Бала дәваланып терелгән, аны өенә җибәргәннәр, диелә бу хәбәрдә.