«Дөрес җирләнмәгән». Чаллыда 89 яшьлек әбине кабереннән казып алмакчы булганнар | intertat.tatar

«Дөрес җирләнмәгән». Чаллыда 89 яшьлек әбине кабереннән казып алмакчы булганнар

Әбине моргка илтмичә генә соңгы юлга озатканнар. Бер елдан соң тикшерү органнары мәетне эксгумацияләүне сорап судка мөрәҗәгать иткән.

Аеруча мөһим эшләр буенча тикшерүче 89 яшьлек хатын-кызның мәетен эксгумацияләүне сорап Чаллы судына мөрәҗәгать иткән. Биредә шәхесе ачыкланмаган кешегә карата үтерү турында җинаять эше ачылган. Әлеге мөрәҗәгать шуңа нигезләнгән. Бу турыда «Челнинские известия» хәбәр итте.

Чаллыда яшәүче 89 яшьлек әби 2020 елның 15 июлендә шәһәрдәге фатирларның берсендә үлгән. Аның мәетен моргка илтмәгәннәр, үлемне документлар белән рәсмиләштермәгәннәр. 

Әбинең мәетен Әлмәт районындагы авылга алып кайтып киткәннәр. Шулай итеп бу хатын-кыз судмедэкспертиза уздырмыйча гына җирләнгән. Тикшерүчеләрдә шул сәбәпле сораулар туган.

Прокурор ярдәмчесе һәм әбинең туганы тикшерүче үтенечен канәгатьләндермәүне сораган.

Суд җинаять эшен ачу турында карарда да, тикшерүченең мөрәҗәгатендә дә мәетне эксгумацияләү өчен нигезле сәбәпләр күрсәтелмәгән дип нәтиҗә ясый. Әбинең үлеме сәбәпләрен ашыгыч ярдәм табибларын сораштыру, ашыгыч ярдәм чакыру картасын өйрәнү яки башка төрле тикшерү гамәлләрен башкару юлы белән ачыкларга мөмкин диелә.

Үлем фактын билгеләү тәртибен бозу гына мәетне эксгумацияләү һәм мәрхүмнең якын туганнарының гаилә тормышын хөрмәт итү хокукына тыгылу өчен сәбәп була алмый. Шуңа күрә суд тикшерүченең үтенечен канәгатьләндерүне кире каккан. Суд карары үз көченә кермәгән әле, диелә бу хәбәрдә.