Казан уртасында бер иномарка ике кешене һәм берничә машинаны бәрдергән

Әлеге вакыйга видеосы социаль челтәрләрдә чыкты.

Казан үзәгендә Татарстан урамында бер машина ике ир-атны таптаган, аннары тагын берничә машинага бәрелгән. Бу турыда «Татар-информ» агентлыгы хәбәр итте.

Кадрлардан күренгәнчә, урамда берничә ир-ат караңгы төстәге иномарка йөртүчесе белән сөйләшә.

Аннары иномарка артка таба хәрәкәт итә башлый, бер ир-атны таптый, икенче ир-атны башка машиналар арасына кыстырып куя.

Шуннан соң авария ясаган машина качып китә, зур тизлектә барганда тагын бер машинага бәрелә.

Шаһитлар сүзләренчә, караңгы төстәге «Шкода» йөртүчесе берьюлы берничә машинаны бәрдерә, аннары шул машиналарның берсе автобуска килеп керә.

Бу хәлнең сәбәпләре ачыклана, диелә хәбәрдә.