Ун ел элек бер хатынны үтергән кешеләрне социаль челтәрдәге фотолары аша тапканнар | intertat.tatar

Ун ел элек бер хатынны үтергән кешеләрне социаль челтәрдәге фотолары аша тапканнар

Заманча программалар кулланып, тикшерүчеләр фотоны социаль челтәрләрдәге сурәтләр белән чагыштыра.

Петербургта ун эл элек булган җинаятьтә катнашучыларны быел эзләп тапканнар. Бу турыда ТАСС агентлыгы Тикшерү комитетына сылтама белән хәбәр итте.

Россия Тикшерү комитеты рәисенең урынбасары, юстиция генерал-лейтенанты Александр Клаус әлеге вакыйга турында сөйләгән. 

Аның сүзләренчә, узган еллардагы зур җинаятьләрне ачу өчен яңа ысуллар кулланыла.

2010 елда Красносельский районында бер хатын-кызны үтерәләр. Тикшерү барышында үтерүченең фотосурәтен табалар, тик җинаятьтә шикләнелүченең үзен тоткарлый алмыйлар.

Соңрак заманча программалар кулланып, тикшерүчеләр бу кешенең фотосын социаль челтәрләрдәге сурәтләр белән чагыштырып чыгалар һәм тоткарлыйлар. Хәзер җинаятьчеләр хөкем ителгән инде.

Клаус сүзләренчә, хәзер тикшерү органнары архивтагы эшләрне барлый, җинаятьтә шикләнелүчеләрнең сурәтләрен өйрәнәләр, диелә бу хәбәрдә.