Балык Бистәсендә дүрт кеше үлгән коточкыч авариянең видеосы чыкты | intertat.tatar

Балык Бистәсендә дүрт кеше үлгән коточкыч авариянең видеосы чыкты

Котлы Бөкәшкә таба бара торган юлда ике җиңел машина кара-каршы бәрелешкән.

Бүген көндез Балык Бистәсе районында коточкыч юл һәлакәте булган. Балык Бистәсе — Котлы Бөкәш автоюлында «Лада» һәм «КИА» бәрелешкәч, урында ук дүрт кеше үлә. Бу турыда «Татар-информ» агентлыгы хәбәр итте.

Мәрхүмнәрнең өчесе «Лада» автомобилендә, берсе «КИА» машинасында булган. Ике машинаның да йөртүчеләре урында үлгән.

Соңрак фаҗига урыннан видеолар да чыкты. Кадрлардан күренгәнчә, ике машина да бик нык җимерелгән, машиналар янында кешеләр ята.

Фаҗига урынына республиканың Балык Бистәсе районы прокуроры Руслан Шакирҗанов килгән. Бу турыда Татарстан прокурорының өлкән ярдәмчесе Руслан Галиев хәбәр итте.

«Балык Бистәсе — Котлы Бөкәш юлының 3 нче километрында авариядә дүрт кеше һәлак булды. Тикшерү барышы контрольгә алынды. Урында ЮХИДИ хезмәткәрләре эшли», — диелә прокуратура хәбәрендә.

«Комсомольская правда» сайты Эчке эшләр министрлыгына сылтама белән хәбәр иткәнчә, авария 11.50 сәгатьтә була. Якынча белешмә буенча, «КИА» каршы як полосага чыга һәм «Лада» белән бәрелешә, диелә бу хәбәрдә.