Россиядә танылган актрисаның 2 миллион сум акчасын талаганнар

Кырыкалдарлар аның банк карточкасыннан ике миллионга якын акчасын урлаганнар.

Россиянең атказанган артисты Валентина Савельеваның банк карточкасыннан ике миллион сумга якын акчасын урлаганнар.

“Комсомольская правда” газетасы хәбәр итүенчә, аның телефонына бер ир-ат шалтыратып, үзен банк хезмәткәре дип таныштыра. Хәзерге вакытта ханымның банктагы исәп-хисап счетында шикле операция барганлыгы турында хәбәр итә. Шалтыратучы пошаманга калган 79 яшьлек актрисаны тынычландыра. Саклык чараларын булдыру өчен дигән булып, банк карточкасының яшерен шәхси номерларын алуга ирешә.

Счетыннан 1 950 720 сум күләмендәге акча югалуын белгән танылган театр һәм кино артисткасы шунда ук хокук сакчыларына хәбәр итә.

Әлегә акчалар табылмаган. Кырыкалдарларны эзләү дәвам итә.