Алты яшьлек бала кышкы трассада ялгызы йөргән

Әти кеше малае тәрәзәдән ыргыткан башлыкны эзләгән арада, баланы чит хатын-кыз алып китеп, полициягә тапшырган.

Краснодар өлкәсендә трассада алты яшьлек малай табылган. Узып баручы хатын баланы үз машинасына утырткан һәм полициягә илтеп биргән. Бу турыда «Вести» каналы хәбәр итте.

Бала турында мәгълүмат инстаграмда «Добрые руки Краснодар» сәхифәсендә чыкты.

Биредәге матбугат чаралары хәбәр иткәнчә, малай башлыгын салып, машина тәрәзәсеннән ыргыткан. Шуңа ачуы чыккан әти кеше малайны юлда төшереп калдырган, башлыкны эзләргә кушкан. Ләкин бу мәгълүматны полициядә расламаганнар.

Эчке эшләр министрлыгының Краснодар өлкәсе буенча баш идарәсендә хәбәр иткәнчә, бала әтисе белән машинада бара. Чыннан да, ул башлыгын тәрәзәдән ыргыта. Әти кеше машинаны туктата, үзе башлыкны эзләргә китә, балага салонда утырып торырга куша. Ләкин әтисе кире әйләнеп килгәндә, бала салонда булмый. Әти кеше шунда ук полициягә шалтырата. Ә бу вакытта баланы битараф булмаган хатын очрата һәм үз машинасына утыртып алып китә.

Баланың гаиләсе яхшылар исәбендә, диелә бу хәбәрдә.