Яшен вакытында агач астына качкан йөкле хатын һәлак булган, биш кеше имгәнгән | intertat.tatar

Яшен вакытында агач астына качкан йөкле хатын һәлак булган, биш кеше имгәнгән

"Карасам, агач астында кешеләр ята. Агач урталай ярылган", - дип сөйли шаһитлар.
Ростов өлкәсендәге Шахты шәһәрендә 25 яшьлек хатын-кыз үлеме буенча тикшерү эше ачылган. Бу турыда Ростов буенча Тикшерү комитеты матбугат хезмәте хәбәр итте.

Башлангыч мәгълүматлар буенча, көчле яңгыр вакытында агачны яшен суккан. Агач астында качып торган 25 яшьлек хатын һәлак булган.

Бу хатын янында булган тагын биш кеше төрле җәрәхәтләр алган. Аларны хастаханәгә алып киткәннәр. 

Җирле матбугат чаралары бу кешеләрнең комлыкта ял итүен һәм, яшен башлангач, агачлар артына качуын язды. Бер агачны яшен суккан. Бу басма хәбәрендә үлгән хатын-кыз йөкле булган диелгән.

"Комлыкта утыра идек. Яңгыр ява башлады. Кешеләр агачлар астына кереп качты. Шул вакытта көчле шартлау тавышы чыкты. Паника башланды. Карасам, агач астында кешеләр ята. Агач урталай ярылган. Бик куркыныч картина иде", - дип сөйләгән шаһитлар.