Ике иномарка бәрелешкәч, салондагы кешеләр юлга очып чыккан мизгел видеога эләккән

Ике иномарка бәрелешкәч, салондагы кешеләр юлга очып чыккан мизгел видеога эләккән
Мәскәү өлкәсендәге Клин шәһәрендә авариядә ике кеше җитди имгәнгән. Ике автомобиль бәрелешкән мизгелне регистратор камерасы төшереп алган. Бу кадрларны "Вести" каналы күрсәтте. 

14 майда иртәнге унберләр тирәсендә урам чатында ак төстәге Volkswagen сулга таба борылырга җыена. Аның каршына зур тизлектә Audi килә. Шушы ике автомобиль чатта бәрелешкәч, Audi салонындагы машина йөртүче һәм пассажир юлга атылып чыга. Бу ике кеше куркынычсызлык каешын эләктермәгән булган. 

"Анда ак машина гаепле. 100 процент! Сулга борылу өчен светофор угы янарга тиеш, ә ул тәгаен янмый иде", - дип сөйләгән бу аварияне күреп торган кеше. 

Имгәнгән кешеләргә шаһитлар ярдәм иткән. Аларны аякка бастырганнар. Ир-атларга табиблар ярдәме кирәк булган. Имгәнүчеләрнең сәламәтлеге турында өстәмә мәгълүмат хәбәр ителми.