Татарстанда ике яшьлек баланы әнисе буып үтерергә маташкан | intertat.tatar

Татарстанда ике яшьлек баланы әнисе буып үтерергә маташкан

Тикшерү вакытында баланы башка гаиләгә тәрбиягә биргәннәр.

Татарстанның Сарман районында яшәүче хатын исерек килеш ике яшьлек баласын буып үтерергә маташкан. Бу турыда «Татар-информ» агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

Тикшерү версиясе буенча, 9 гыйнварда 26 яшьлек хатын исерек була. Ул ике яшьлек баласын сөйрәп ала һәм буа башлый. Хатын белән бергә яши торган ир-ат баланы коткара.

Әни кеше гаебен таный, үзенең гамәлен «балага карата кисәк кенә барлыкка килгән ачу» белән аңлата.

Җинаять эше ачылган, психология-психиатрия экспертизасы билгеләнгән. Баланы башка гаиләгә тәрбиягә биреп торганнар. Хатынны ана булу хокукыннан мәхрүм итү турында мәсьәлә хәл ителә, диелә хәбәрдә.