Рената Литвинованы туган көнендә машина таптаган

Бүген Рената Литвиновага 53 яшь тулды.

Россиянең атказанган актрисасы Рената Литвинованы туган көнендә Мәскәү үзәгендә йөргәндә машина таптаган. Бу турыда «Вести» каналы хәбәр итте.

Яшь кыз идарә иткән машина актрисага «Макдоналдс» рестораны янында бәрелә. Аның кулы һәм аягы имгәнгән. Табиблар актрисага ашыгыч ярдәм күрсәткән.

РЕН ТВ хәбәр иткәнчә, машина белән идарә иткән хатын Литвинованы исерек дип әйткән булган.

Рената Литвинова авария турында социаль челтәрдә аңлатма бирде. Ул хәзер хәле яхшы булуын, табиблар иягендәге яраны тегүен язды.

«Мине салонга барышлый машина таптады. Мин ап-аек идем (матбугатта чыккан хәбәрләргә карамастан). Руль артында булган кызга бер сүз генә әйттем: «Җәяүлеләр йөри торган юлда бәрдергән өчен оят түгелме? Минем туган көнем бит әле бүген», дидем.

Литвинованы бәрдергән Mercedes йөртүчесен полиция бүлегенә алып киткәннәр. Литвинова үзе хокук саклаучылар килгәнче үк авария урыныннан китеп барган.

Рената Литвинова моңа кадәр генә Инстаграмдагы сәхифәсенә аклы-каралы фото куйган булган. Ул ялтыравыклы озын күлмәк кигән һәм җимерек стена янында басып тора. «Киләчәктә чыгачак китаптагы фото», — дип язган ул фото янына.

Актрисаның яраткан тамашачысы туган көне белән котлый һәм тизрәк терелүен тели.