Кытайда унсигез коткаручы тереләй янып үлгән

Янгын сүндерүчеләр һәм аларны озата баручы кеше ут капкынына очраган.

Кытайның көньяк-көнбатышында 31 мартка каршы төндә коточкыч фаҗига була. Сычуань провинциясендә коткаручылар янып үлә. Бу турыда «Синьхуа» басмасына сылтама белән «Вести» каналы хәбәр итте.

Бер авылда фермада янгын чыга. Ут якындагы урманга һәм калкулыкларга күчә. Урынга 300 коткаручы килә, аларга 700ләп волонтер кушыла. 

Ут белән көрәшкән вакытта янгын сүндерүчеләрнең бер отряды һәм аларга юл күрсәтеп баручы урман хуҗалыгы хезмәткәре ут капкынына эләгә. Җил юнәлеше үзгәргәч, ялкын кешеләрне чолгап ала. Кызганыч, алар барысы да һәлак була, диелә хәбәрдә.