Мәрьям Миңнегуловадан лимон белән әфлисуннан катлы пирог рецепты

«Рецептларга килгәндә әлбәттә үзем уйлап чыгарган рецептлар түгел, интернеттан аласың да, пешереп карыйсың. Күңелеңә хуш килгәнен генә халыкка тәкъдим итәсең», - ди Азнакайда яшәүче аш-су остасы Мәрьям Миңнегулова.

Камыр өчен: 1 стакан җылы сөткә 1 аш калагы коры чүпрәне салып күпертеп алабыз.



100 грамм ак майны эретәбез, 1 аш калагы шикәр комы салабыз, ярты чәй калагыннан әзрәк тоз, 1 йомырка, күпертелгән сөтле чүпрәне болгатабыз да, он кушып камыр басабыз. Кабарыр өчен җылы урынга куябыз.

Эчлек өчен 1 лимон, 2 әфлисунны иттарткычтан үткәреп шикәр комы салабыз.

Камырны өч кисәккә бүләбез. Олырак өлешен табага җәеп, өстенә эчлек салабыз. Өстенә бәләкәй кисәк камырны җәйгәннән соң, эчлек салабыз да, тагын камыр белән каплап, читләрен матур итеп бөрәбез.

Пирог өстенә валчык ясап салырга була. Валчык май, песок, онны уып ясала.

Тәмле булсын!