Илсөя Бәдретдинова кычыткан ашы пешергән

Җырчы Илсөя Бәдретдиновадан, Азнакай районы Мәндәй авылында яшәүче Мәрьям Миңнегуловадан һәм Казанда яшәүче Әлфия Газизовадан кычыткан һәм кузгалак ашлары рецептларын тәкъдим итәбез.
Җырчы Илсөя Бәдретдинова Инстаграмга авылда кычыткан җыйган фотосын куйган. "Укроп, яшел суган, йомырка туглап салып пешерәсең, ачыган катык белән ашасаң", дип "авыздан сулар килерлек" итеп сөйли җырчы.


Ит шулпасы кайнатырга, сөзәргә, шулпага бер ике бәрәңгене саламлап турап салырга.

Кычытканның матур өске яфракларын җыярга, юарга, кайнар су белән пешекләргә, вак итеп турарга, 4-5 йомырка салып тугларга.

Шулпага йомыркалы кычытканны салырга, кайнап чыккач та бераз сүрән утта тотарга.

Кишер белән суганны майда кыздырырга, лавр яфрагы салырга.

"Элек кысыр аш пешерәләр иде,анысы итсез шулпага гына. Ә итле шулпа үзенчә тәмле", - дип яза Мәрьям ханым.

Кузгалаклы ашка килгәндә, ул да шул тәртиптә пешерелә. Итле шулпага кишер, кузгалак, кычыткан, бәрәңге салып пешерергә.

"Табынга биргәндә бер тәлинкәгә пешкән йомырканы дүрткә бүлеп салырга мөмкин", - ди Әлфия ханым.
Ә сез кычыткан һәм кузгалак ашы пешереп ашарга өлгердегезме әле?