Шомырт пирогы рецепты

Үземнең бик күптәнге камыр рецепты белән бүлешим әле, бик тәмле, җайлы гына чыга. Песочный камыр дип йөртәм мин аны, бу юлы ул камырдан шомырт пирогы пешердем. 
Камыр өчен: 200 грамм атланмай яки маргарин, 1 йомырка, 100 грамм сөт, 20 грамм шикәр комы,
20 грамм чүпрә, чамалап тоз, кирәгенчә он.

Барысын бергә болгатып, җылы урынга кабарырга куярга.

Эчлек өчен: 400 грамм шомырт, 2 алма, 3 аш кашыгы шикәр комы.

Шомыртны 4-5 тапкыр иттарткычтан чыгарырга, шуна тәмле алманы угычтан уарга, шикәр комы салып, ут өстендә әзрәк пешереп алырга. 

Эчлек өсте: 2 йомырка, 250 грамм каймак, 250 грамм куертылган сөт, әстерхан чикләвеге. Йомырканы миксер белән күпертергә, шуңа каймак һәм куертылган сөтне салып болгатырга, бераз миксер белән күпертеп алырга.

Камыр кабаргач (ул әлләни күтәрелми), камырны җәеп табага салырга, шуңа әзер шомырт эчлеген җәяргә, аның өстенә эчлек өстен агызырга. Әстерхан чикләвеге тезеп матурларга. Чикләвекне ваклап сибәргә дә була.