Тинчурин театрының "алтын фонды", легендар Исламия Мәхмүтова 75 яшьлек юбилеена тамашачысына спектакль бүләк итте

30 декабрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Рузилә МӨХӘММӘТОВА
Фото: Салават Камалетдинов
Россиянең атказанган, Татарстаннаң халык артисты Исламия Мәхмүтова 75 яшьлек юбилеен үткәрде.

Тинчурин театры рәсми рәвештә татар театрының нигезен булдырган шәхесләрнең берсе, классик драматург исемен йөртсә дә, Халык арасында ул Исламия театры, Мәхмүтовлар театры булып кала. Күчмә булды ни, күчмә булмады ни – өлкән буын тамашачы анда Исламия Мәхмүтованы карарга килә. Ул легендар актрисаны сәхнәдә уйнап тормыйча “туда-сюда” йөреп торса да караячак.

Камал театрының “алтын фондын” тәшкил иткән артистлар бер төркем - нигездә Щепкинчылар һәм аларның кордашлары булса, Тинчурин театрының “алтын фондында”, Хәлил Мәхмүтов белән Наил Шәйхетдинов китеп баргач, Исламия Мәхмүтова - берүзе.

Тинчурин театрының легендасы 75 яшьлек юбилеенда сәхнәдә йөреп торырга да теләмәгән, сәхнә түрендә затлы кәнәфидә дә утырып тормаган. Исламия Мәхмүтова тамашачысы алдында артист булып та чыгып басмады. Ул үзен драматург һәм режиссер буларак тәкъдим итте.

Тамашачыга актрисаның “Син бит минем бергенәм” мелодрамасы яңа куелышта тәкъдим ителде.

Премьера

Моңарчы әсәр Тинчурин театрында уңышлы гына барган иде. Исламия Мәхмүтова анда Ташкентка килгән Сылу карчык ролен уйнаган.

Бу юлы ул үзе беркемне дә уйнамады. Сәхнәдә – Исламия апаның кызы Лилия Мәхмүтова, кияве – Ренат Шәмсетдинов һәм сәхнәдәшләре иде. Музыкаль бизәлеш өчен Исламия апаның икенче кызы җаваплы. “Зө-ләй-лә” эстрада төркеме кызларының берсе Ләйсән Мәхмүтова җырларны язган.

Исламия Мәхмүтова пьесаны егетләребез Чечня сугышыннан табутларда кайткан вакытта язган. Төп героиня – Алинә. Сөйгәне Айнур яры армиягә китеп, Чечняда һәлак булган, табуты авылган кайтарып җирләнгән. Биш елдан – Алинә кияүгә чыгып Ташкентта яшәп ятканда Айнурның исәнлеге турында хәбәр килеп ирешә. Алинә Айнурны күрергә авылга кайта.

“Син бит минем бергенәм” спектакле – 100 процентлы мелодрама. Рәхәтләнеп елап утырырга да була, геройларның мәхәббәт җырларына кушылып җырлап утырырга да.

Гафу итегез, шушы урында бал мичкәсенә бер кашык дегет – музыкаль театры труппасы ачу бурычы йөкләнгән театрда артистлар җанлы тавышка җырламадылар. Җырлар яздырылган иде. Алар мин утырган 16нчы рәткә бик зәгыйфь булып килеп ирештеләр. Димәк, зал һәм аның тавыш аппаратурасы тамашачыны камил яңгыраш белән тәэмин итәргә әзер түгел.

Сүз уңаеннан, ә менә азактан Исламия апаның тере тавышы шулкадәр ягымлы, рәхәт булып яңгырады. Исламия Мәхмүтова тавышын бер аппаратура да боза алмый шул.

“Син бит минем бергенәм” спектакле фестивальләргә дәгъвалаучы сәхнә әсәре түгел, ул – 100 процент татар тамашачысы спектакле. Аңа тамашачы йөриячәк һәм нәкъ менә Исламия исеменә йөриячәк. Исламия апа үзе уйнамаса да йөриячәк.

Минем, Тинчурин театры фойесында Исламия Мәхмүтованы очраткач, “Исламия бит бу” дип балалар кебек сөенгән һәм рөхсәт сорап актрисага кагылып караган тамашачыларны күргәнем бар.

Исламия Мәхмүтова үз юбилее кичәсендә халкы каршына спектакль тәмамланып артистлар баш игәч кенә чыкты. Котлауларны ул аягөсте кабул итте.

Шәймиевтан – алтын сәгать

Рәсми котлауларны легендар актрисага Дәүләт Советы Рәисе урынбасары Римма Ратникова тапшырды. Болар - “Республика алдындагы казанышлары өчен” ордены медале, Татарстанның Дәүләт Киңәшчесе Минтимер Шәймиевның Рәхмәт хаты һәм алтын сәгать. Татар театрының “алтын фондына” алтын сәгать!

Котлаучылар арасында Мәхмүтовлар династиясенең кияве – Рузия Мотыйгуллинаның ире, Бөтендөнья татар конгрессы башкарма комитеты җитәкчесе Ринат Закиров та бар иде – ул Конгрессның югары бүләге булган медаль тапшырды.

Котлаучылар арасында Исламия Мәхмүтованың яраткан оныгы да бар иде - ул дәү әнисенең юбилее алдыннан гына армиядә хезмәт итеп кайткан. Оныгының чип-чиста итеп татарча сөйләшә алуы белән бик сирәк татар артистлары гына горурлана ала. Исламия Мәхмүтова – шул сирәкләрнең берсе.

“Мин әле театрда алга таба да эшләргә ниятлим”, диде Исламия Мәхмүтова тамашачысына һәм сәхнәдәшләренә рәхмәтләрен әйтеп.

Исламия Мәхмүтованың “визитка” җырларының берсе булган “Картаямыни йөрәк?” җырын ул бернинди язмаларсыз сәхнәдәшләре белән бергә рәхәтләнеп башкарды.

Татар театрының легендар актрисасына Россиянең халык артисты мактаулы исемен бирерләр дигән ышанычым бар иде. Әлегә булмады. Көтәбез. 



  Без Инстаграмда

Фикерләр








Мәдәният

Исламия Мәхмүтова Хәлил Мәхмүтовка багышлап шигырь язган: "Картаеп беткәнче, әби белән бабай булып, бергәләп йөрербез дип уйлаган идем"

Кәрим Тинчурин исемендәге Татар дәүләт драма һәм комедия театры артистлары Хәлил Мәхмүтовны искә алды.  Коллегалары Татарстанның халык артистының соңгы көннәрен, аның белән уйнаган ролләрен искә төшерде.

Мәдәният

Данил Салихов: “Драматургия кирәкми дигән фикер дөрес түгел”

"Татар-информ" агентлыгына интервьюсында Язучылар берлеге рәисе Данил Салихов драматургиянең бүгенге хәле, Язучылар берлегенең эшчәнлеге, Интернеттагы активлык, татар телен укыту мәсьәләсен хәл итү турындагы сорауларга үз фикерен белдерде.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла