Илһам Шакировның 1996 елгы әңгәмәсеннән: "Безнең дә хәзерге балалар кебек тәмле ашыйсы, матур киенәсе килгәндер ул"

22 июнь 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

"Татарстан яшьләре" газетасында 1996 елда 5 март санында Илһам Шакировның күңеленә уелып калган балачак хатирәләре басылып чыккан. Әлеге мәкаләдә Илһам Шакиров сугыш чорында укыган вакытларын искә ала, хатирәләр яңарта.

Сугыш вакыты иде. Беренче класста укыган чак. Мәктәп укучылары, авыл яшьләре белән чыршы бәйрәме оештырырга уйладык. Мине концертның “кадагы” итеп иң актыкка калдырдылар. 2-3 җыр җырладым. Залда аналар да балалар инде, сугыш вакыты бит. Бәйрәм үтте. Икенче көнне дус малайлар миңа әйтәләр: “Син җырлаганда әниләр, апалар елап утырды!” Шул вакытта оялуларым, шул вакыт уңайсызлануым – җир ярылса, җир тишегенә керердәй булдым. Үземне зур җинаятьче итеп тойдым. Ничек инде әниләрне елатырга була?! Бу минем башыма сыймады. Шулай да, җырлаудан туктамадым, чөнки миннән башка концерт булмый иде.

Аннан соң, гомердә дә онытасы юк, үз-үземне белештерә башлаганнан бирле мин чабата үрдем. Әни, туганнарым җыелып утарыбыз да, бил бөкерәйтеп, күз чекерәйтеп чабата үрәбез. Әни белән без икәү җырлыйбыз. Ә әтине хәтерләмим, чөнки аны миңа ике яшь вакытта алып киттеләр. Халык дошманы дип. Әтиебезгә шундый кара исем тагып, безне гел кагалар иде. Налогны да бездән күбрәк алалар иде. Хәтерлим әле, налог түләмәгәнсез дип, баздан соңгы бәрәңгене алып чыгып киттеләр. Шул вакытларда ашамаган туфрак кына калды. Иртән торасың, өйдә бер валчык ипи кисәге, ризык әсәре юк. Юк инде менә, юк, нишлисең. Тик нигәдер, мин аның сәбәбен хәзер дә аңлый алмыйм, керәшен авыллары баерак, җитенкерәк иде. Иртән торып керәшен авылларына соранырга бара идек. Ләке дигән бер керәшен авылына барып, үзебезнекенә охшаган бер өйгә кердек. Тезелешеп утырганнар идәнгә. Болар да пыр тузып чабата үрәләр. Эреле-ваклы балалар, барысы да анадан тума шәрә. Өйләренә таяк тыгып бутасаң да бер нәрсә эләгерлек түгел инде, бушлык. Шуннан: “Бераз бәрәңгегез юкмы, без берни ашамаган”, - дигәч, хуҗа хатын бераз бәрәңге бирде. Шуны кабыгы-ние белән пешереп “авыз ачтык”.

Аннан соң, мәктәптә киез итеклеләргә каршы чабаталылар сугыша идек тәнәфестә. Киез итеклеләр хәллерәк гаиләләрдән, андыйлар аз. Һәрвакыт без – чабаталылар җиңә идек. Шулай ук җыр дәресендә: “Аерым-аерым җырлыйбыз”, - дип, мине җырлатыр өчен хәйлә корганнары истә. Тавышы булмаганнарга бик ялынып тормыйлар инде. Ә мине әллә ничә кат җырлаталар иде. Җырлар гел кайгы-хәсрәтле була инде.

Аннан соң шул хәл истә калган. 4нче класстан соң без башка авылга барып укый башладык. Мәктәпкә барганда юлда куаклык бар иде. Иртән пешкән бәрәңге катыларын әлеге куаклык арасына күмеп калдыра идек. Шуны дәрестән иртәрәк качып киткән малайлар ашап бетерәләр иде. Менә син ә! Кайт ышанып, бәрәңге ашыйм дип.

Күп инде ул балачак хатирәләре. Безнең дә хәзерге балалар кебек тәмле ашыйсы, матур киенәсе килгәндер ул. Тауга карап тау буласы килә. Әмма без юклыкны белә идек. Нәрсәгә генә кызыксак та, аны булмасын белә идек. Без моңлана, кайгыра белә идек.


  Без Инстаграмда

Фикерләр








Мәдәният

«Әпипә»: Миләүшә Айтугановадан – татар эстрадасының чын йөзе

Татарстан киносы көннәренең финалы буларак "Әпипә" татар музыкаль фильмының премьерасы тәкъдим ителде. Тамашачы аны аншлаг белән карады, оештыручылар икенче көнне өстәмә сеанс куярга мәҗбүр булдылар. Фильмның идея авторы һәм продюсеры - Миләүшә Айтуганова. режиссер - Илшат Рәхимбай. Киносценарий авторы - Марат Кәбиров.

Мәдәният

“Безнең җыр”ны сайлыйбыз: "Я камыры чи, я бәрәңгесе каты..."

Кариев театрында “Безнең җыр” иҗат лабораториясенең икенче этабы үтте. “Калеб” яңа буын иҗат берләшмәсе оештырган иҗади лабораториядә катнашучылар яңа татар эстрадасы өчен җырлар тәкъдим иттеләр. Безнең татар эстрадасын күзәтүче Алинә Айдаровадан яңа татар эстрадасы җырларына караш. 

Мәдәният

«Дәрдемәнд»: Нурбәк Батулланың шагыйранә каны

«Дәрдемәнд» импровизацион хореографик спектакле башланыр алдыннан режиссер Туфан Имаметдинов каннан куркучы тамашачыларның залдан чыгуын үтенде. Заманча сәнгать галереясында «Әлиф»че егетләрнең яңа тамашасы шулай башланды.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла