"Килде Исмәгыйльләр, киллер булып": Шагыйрьләр бүгенге көн Галиябануы турында уйлана

10 ноябрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Фото: Г.Камал театры архивыннан
Әлеге әңгәмә моннан 20 ел элек — 1998 елның 11 декабрендә "Мәдәни җомга" газетасында басылып чыккан. Язучылар һәм шагыйрьләр бүгенге көн Галиябануы турында үз фикерләрен әйтә.
Әңгәмәдәш: Нурия Сәйәр

— Хәзерге көн Галиябануын ничек күзаллыйсыз, ул ниндирәк булырга тиеш? 

Зөлфәт, шагыйрь: 
— Мәхәббәткә кагылышлы һәр язганым Галиябану хакында булды бугай. Һәркем үзенә генә хас Галиябануны эзли һәм табарга тырыша. Алай булмаса, ул кеше — гомерлек бәхетсез. Яшәсәң шулай яшә — сине Галиябанудай гүзәлкәй яратырлык итеп. Ә аның өчен сиңа үзеңә дә асыл булырга кирәк. "Асыл" дигән сүзгә тукталыр идем. Малай чагыңда асыл малай була бел, егет чагыңда асыл егет бул, ир чагында — асыл ир. Галиябану бүгенге хатын-кызларга өлге ул, көчле шәхес, асыл шәхес. 

Илдар Юзи, шагыйрь: 
— Иркәләр дә, сылулар да бетмәс, 
Туып тормаса да гел генә. 
Башка Галиябану инде тумас —
Татарда ул бары бер генә. 
Шушы таныш көйне җырлый-җырлый, 
Мин дә бүрәнәгә абынам, 
Заман хисләренә кагылам да, 
Галиябану, сезне сагынам. 
Еллар үткән саен сагындырыр 
Мәхәббәткә тугры корбаннар. 
Килде Исмәгыйльләр, киллер булып, 
Акча өчен ата торганнар... 

Камил Кәримов, язучы-сатирик: 
— Галиябану — мәктәпне яңа гына тәмамлап, әле бүген генә Казанга килеп кергән инсафлы, самими авыл баласы. Кызганыч ки, шәһәргә килгәч, күп кенә татар кызларының язмышы "Анна Каренина" булып бетә.

Рәдиф Гаташ, шагыйрь:
— Шәхсән үземә, Галиябану образы мәхәббәт шагыйре булуыма зур этәргеч ясады. Шигъри карашым белән мин аны җирдән югарырак, фольклор, җыр белән өретелгән гаҗәеп җанлы, җылы, сихри бер илаһи зат итеп күзаллыйм. Шундук җырның сүзләре, моңы яңгырый башлап, мәңгелек шигърият, матурлык, сафлык, гүзәллек, камиллек күз алдына килеп баса. Әдәби әсәр героинясы буларак, ул мәңге үзгәрешсез бөек бер үрнәк образ, шигъри сурәт булып татарның милли аңында мәңгелеккә калачак. Хәтта яшәеш дәверендә заман, әхлак нормалары үзгәрсә дә. Хәзерге кызлар, мәхәббәтләренә тугры калып, гаҗәеп гүзәл Галиябанудан үрнәк алырга тырышсалар икән. 

Галимҗан Гыйльманов, язучы: 
— Бүгенге көн Галиябануын мин бер төрле генә күз алдына китерәм. Ул, һичшиксез, Хәлилдән ваз кичеп, Исмәгыйльгә кияүгә чыгачак. Исмәгыйльне шәһәргә алып китеп, анда кибет ачып, сату итәчәк, бөтен бай тормышны сайлаячак. Әлбәттә, авылны да онытмаячак ул. Туган нигезенә кайткан саен, яшьлек мәхәббәтен — Хәлилне очраткан саен йөрәк түрендә иң саф, иң җылы хисләр кузгалачак, әмма ул Хәлил белән бергә булмаячак. Галиябану үзенең тук, җитеш тормышын очын очка чак-чак кына ялгап яшәгән Хәлил тормышына бервакытта да алыштырмаячак.

Гәрәй Рәхим, шагыйрь: 
— Галиябану әхлак ягыннан да, җәмгыятькә, мәхәббәткә карашы, чибәрлеге ягыннан да элеккеге Галиябанудай булырга тиеш инде ул. Заманча зәвык белән киенә дә белсен, үз кулы белән акча да эшли ала торган булсын. Дөрес, хәзерге көндә матур итеп киенә, матди яктан үз-үзен тәэмин итә торган гүзәлкәйләр аз түгел. Ә менә бөтен яктан да Галиябанудайлар бик сирәк.

Фикерләр








Мәдәният

"Шәһәрчеләр" - Илүсә Хуҗина: “Европада бөтен чит ил программасын җырлый алам, ләкин организмым татарча җыр таләп итә”

Могҗиза булып чып-чын татар дәүләт музыкаль театры ачыла калса, аның примасы Илүсә Хуҗина булыр иде. Әмма татарның андый театры булмаганга күрә Илүсә Хуҗина әле прима түгел, әмма Татарстанда үткән һәм рәсми һәм рәсми булмаган концертның бизәге.

Мәдәният

"Шәһәрчеләр" - Туфан Имаметдинов: Мин куллана торган иҗади тел тамашачыга кирәк булып чыкты, әмма татар кешесе бу юнәлешне үтерергә дә мөмкин

Туфан Имаметдиновның Казанга кадәрге чорындагы уңышларын язып тормыйм, алар бар. Ә татар театры тамашачысы аның иҗаты белән Чаллы театрында куелган “Тирәкләр шаулый җилдә” (Жеральд Сиблейрас) спектакле аша танышты. Чаллы – Туфанның туган шәһәре. Ә Казанда куелган беренче спектакле Дмитрий Богославскийның “Любовь людей” иде. Ул аны Казан яшь тамашачы театрында куйды. Озак та үтмәде, Туфан әлеге театрның баш режиссеры итеп билгеләнде. Бу карар – ул чакта Татарстан мәдәният министрының беренче урынбасары Ирада Әюпова карары иде.

Мәдәният

“Ашкына гомер” җырының авторы Мидхәт Әбделмановка 75 яшь!

“Талантлы кеше – һәр яклап та талантлы” дигән әйтем бар. Уфада яшәүче милләттәшебез, матур, мәгънәле шигырьләр һәм аларга көйләр язучы талант иясе, Башкортстан Язучылар берлеге әгъзасы Мидхәт Мәҗит улы Әбделмәновка да тулысынча туры килә бу гыйбарә. 75 яшьлек юбилеен билгеләп үткән аксакал бүгенге көндә дә иҗаттан туктамый.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла