Татарстан кырларында адашып йөргән ир-атның ничек үлгәне билгеле булды

Сентябрь азагында Татарстанда югалган 36 яшьлек ир-ат кырда өшеп үлгән. Аның мәетен Чистай районындагы чокырда тапканнар. Бу  турыда «Татар-информ» агентлыгы үз чыганакларына сылтама белән хәбәр итә.

30 сентябрьгә каршы төндә бу ир-ат Яңа Чишмә районының Шахмайкино авылыннан чыгып китә. Ул Түбән Кама районының Карамалы авылына барырга җыена. Юлда барганда машина тәгәрмәче тишелә. Ул абыйсына шалтыратып, ярдәм сорый. Үзе исә машинасын кырда калдыра һәм туганына каршы китә. Бу кеше иртәнге өч тирәсендә абыйсына соңгы тапкыр шалтырата һәм адашуын әйтә. Шуннан соң аның белән элемтә өзелә.

13 октябрьдә бу ир-атның мәетен Чистай районының Каргалы һәм Әзи авыллары арасындагы чокырда тапканнар. Агентлык чыганагы ир-атның салкында өшеп үлгәнен хәбәр итә.