Тәрәз төбемдә... зират: Иске Шигали халкы яңа зират урынына каршы

23 ноябрь 2017

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Яңа зират урыны белән шәхси йорт арасында 10 метр да ара юк.

Үзара салым акчасы – авыл җирлеге башлыкларының дүрт күз белән көтеп торган кереме. Референдум узганчы ук, җитәкчелек инде аны кая тотасын уйлап куя. Күпчелек авыллар шуның хисабына юллы була, икенчеләргә ут, су кертә. Ә менә Питрәч районының Иске Шигали авылында узган елгы үзара салым акчасын авыл уртасында койма тоту өчен тотканнар. Авыл уртасында койма нигә кирәк диярсез? Җавабы шул – киләчәктә бу урын зират булып, каберләр калкып чыгачак. Билгеле, кемнең авыл уртасында зират булдырасы килсен, Шигали халкы да моңа каршы чыккан, – дип хәбәр итә “Татарстан24” каналы.

Моңа кадәр авыл зираты читтә булган. Ул берәүгә дә комачау итмәгән. Ә хәзер исә җирле хакимият авыл уртасында буш торган урынны зират итәргә уйлый.

Яңа зират коймасы белән шәхси хуҗалык арасында 10 метр да ара юк. Җирле халыкны куркыткан күренеш: йокыдан тору яки төнлә кинәт уянып китүгә, тәрәз каршындагы каберләр белән күзгә-күз очрашу.


Яңа зират мәсьәләсе, нигездә, Иске Шигали халкының урта һәм яшь буынын күбрәк борчый. Авыл җирлеге башлыгы белән очрашуда да төп масса шулар.

– Һичшиксез судка бирәбез, бу мәсьәләне хәл итәчәкбез, – ди Шигали җирлеге башлыгы Фәрхәт Сәләхиев.


Аның сүзләренчә, зират өчен җирне, йортлар төзергә рөхсәт бирелгәнче үк, бүлгәннәр.

Авыл халкы аптырашта, янәсе, зират урыны алдан билгеле булгач, нигә безгә йорт салу өчен бу җирләрне саттыгыз соң? Җитәкченең моңа да җавабы әзер: "Моны сезгә мин сатмадым”.

Әмма бердәм авыл халкы тынычланмый: “Сез бит хакимият вәкиле, димәк, сез төзелешкә рөхсәт биргәнсез!” - ди алар.

Фәрхәт Сәләхиев сүзләренчә, авылга койма кирәклеге хакында җирле референдумда хәл ителгән. Әмма булачак зиратка терәлеп үк торачак йорт хуҗалары бернинди җыен турында белми. Референдумга аларны берәү дә чакырмаган.

– Без монда койма коюгызга каршы түгел. Куелган икән, торсын. Без монда кеше җирләнүгә каршы, – ди Шигали халкы.


Бер активист сүзләрен икенчесе күтәреп ала:

– Әгәр сезнең өегез монда торса, сез шушылай җыен җыймас идегезме? Сезнең өегез монда булса, сез бу урынны зиратка тәгаенләп, койма кормас та идегез, – дип ярсый кулына яшь бала күтәргән ханым.


Авыл җирлеге башлыгы, әлеге зират урыны санитар нормаларга туры килә дигән сүзне алга сөрә. Әмма халык җитәкчеләренең бу сүзенә дә каршы чыкты.

– Ничек туры килсен, менә, мин сезгә барысын да күрсәтә алам, хәер, ник күрсәтергә соң, сез бит аның туры килмәвен болай да беләсез”, – ди сүзендә нык торучы яшь ир.


Җитәкче сүзләренчә, яңа зиратка әле 10-15 еллап кеше җирләнмәчәк. Чөнки иске зиратта урын җитәрлек. Шуңа күрә, зираттагы каберләрне Шигали халкының бүгенге буыны түгел, әнә шул әнисе кулындагы бала күрәчәк.


Активистлар инде санитар-эпидемия хезмәтенә дә мөрәҗәгать иткән. Әгәр боз кузгалмаса, авыл халкы бу мәсьәлә буенча соңгы сулышына кадәр көрәшәчәк. Бу хакта алар прокуратуга язарга, судка бирергә җыена. 


Фикерләр








БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла