Түбән Камадагы паркта ун яшьлек кызларның ни кыланганын видеокүзәтү камерасы төшереп алган
Хәзер балаларның әти-әнисе штраф түләячәк.
Түбән Кама шәһәренең Габдулла Тукай исемендәге паркында ун яшьлек ике кыз вандалллык эшләгән. Бу хәлне күзәтү камералары төшереп алган.
НТР каналы хәбәр иткәнчә, кыз балалар паркка керә торган аркадагы ике лампаны ваткан. Хәзерге вакытта, куркынычсызлык кагыйдәләре буенча, бу иллюминацияне сүндереп торганнар.
Мәктәп укучылары кылган вандаллыкны игътибарсыз калдырмаячаклар. Хокук саклау органнарына гариза язалар. Бу турыда Түбән Кама башкарма комитеты җитәкчесенең урынбасары Павел Пугачев сөйләгән.
«Хәзер шәһәрдә чыршылар куела. Шәһәребез бәйрәмдә матур булсын иде. Әти-әниләр балаларына шуны, аңлатсын иде. Яңа ел шәһәрчекләрендә видеокүзәтү камералары эшли. Ни дә булса ватарга уйласалар, башта шуны искә алсыннар иде. Бу шактый гына зур суммага төшәргә мөмкин. Әлеге очракта кызларның әти-әниләре штраф түләячәк», — дигән Павел Пугачев.