Түбән Камада бер хатын ир кешене кыйнап имгәткән

Түбән Кама районының Олы Афанасово авылында бер хатын ир-атны кыйнаган. Ирнең баш сөяге һәм баш мие имгәнгән. Бу турыда Татарстан прокуратурасы матбугат хезмәте хәбәр итте.

Вакыйга октябрь азагында бакчада килеп чыга. 30 яшьлек хатын шактый гына салмыш була. Бакчага чыккач, ул танышы белән талаша башлый. Шул кадәр кызып китә ки, кулына очраган беренче әйбер белән ирнең башына берничә тапкыр суга. Әлегә бу әйбернең нәрсә булуы ачыкланмаган. Кыйнап туйгач, ирнең йөзенә аягы белән тибеп җибәрә.

Салмыш хатын кыйнаган ир-атның башы имгәнә, баш миенә зыян килә.

Агрессив хатынга карата җинаять эше ачылган. Ул гаебен таный. Җинаять эшен Түбән Кама шәһәр судына тапшырганнар.