Матч беткәч, яшь хоккейчылар сугышкан - видео
Әлеге вакыйга судьялар бригадасы хатасы аркасында килеп чыккан.
Башкортстанның «Салават Юлаев» командасының яшь хоккейчылары арасындагы иптәшләрчә матч күмәк сугыш белән тәмамланган. Бу турыда «Башинформ» агентлыгы хәбәр итте.
Стәрлетамак шәһәрендәге бозда Уфадан килгән һәм Стәрлетамакта шөгыльләнүче уенчылардан торган ике команда очрашкан. Уен беткәч, алар күмәкләп сугышкан. Вакыйга турында видео «Вконтакте» челтәрендә Mash каналында чыкты. Кадрлардан күренгәнчә, күмәкләп сугыша башлаган яшь хоккейчыларны судьялар һәм тренерлар тынычландырырга тырышкан. Ләкин бераздан бозга хоккейчыларның әти-әниләре дә чыккан һәм күмәк сугыш дәвам иткән.
«Башинформ» агентлыгына «Салават Юлаев» хоккей мәктәбе директоры Вячеслав Хаев сөйләгәнчә, әлеге вакыйга судьялар бригадасының хатасы аркасында килеп чыккан.
«Без вакыйганы җентекләп өйрәндек. Яшь хоккейчыларның, тренерларның гаебе барын таныйбыз. Тик матчтагы яшь судья квалификацияле булмаганга, шушы хәл килеп чыкты. Ул уен барышында берничә хата ясады. Уен беткәч тә, командаларны кул кысыштырып тормыйча гына, чишенергә алып китәргә кирәк иде», — дип сөйләгән Вячеслав Хаев.
Тренерлар вакыйганы өйрәнгән. Әти-әниләр һәм балалар белән җыелыш уздырганнар. Бәхеткә, травма алучылар юк.