Казанда бер ир-ат танышын үтереп, мәетен тураклаган

Казанда 39 яшьлек ир-ат танышын үтерүдә гаепләнә. Бу турыда "Татар-информ" агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий сөйләде.

Җинаятьтә шикләнелүче ир-ат танышы белән табын корып утыра. Шул чакта ул танышын үтерә. Аннары мәетне тураклый һәм Казансу елгасы буена күмеп куя.

"8 октябрьдә кич белән Чистай урамындагы йортларның берсендәге фатирда 57 яшьлек ир-ат мәетенең өлешләре табылды. Сибгат Хәким урамында Казансу елгасы буенда ике капчык та табылды. Капчыклар комга күмелгән иде. Аларның эчендә мәрхүмнең мәете кисәкләре салынган", - диде Шептицкий.

Җинаятьтә шикләнелүче ир-атны тиз арада тоткарлыйлар. Тоткарлаганда ул исерек була. Соңрак ачыкланганча, бу ир-атлар табын корып утырганда талаша башлый. 39 яшьлек ир-ат 57 яшьлек танышының башына балта белән суга. Шуннан соң ул куркып кала һәм җинаять эзләрен яшерергә маташа. Мәетне кисәкләргә тураклый. Мәет кисәкләрен урамга алып чыга, шунда аны күршеләре күреп кала. Күршеләр шунда ук полициягә хәбәр итә.

"Үтерү" маддәсе буенча җинаять эше ачылган.