Башкортстан белән Чиләбе чигендә кабат җир тетри

15 ноябрьдә көндезге бер тирәсендә Чиләбе өлкәсе белән Башкортстан Республикасы чигендә яшәүчеләр җир тетрәү тойган. Бу турыда «Башинформ» агентлыгы хәбәр итте.

«РАН бердәм геофизика хезмәте» мәгълүматы буенча, җир тетрәү эпиүзәге Катав-Ивановск шәһәреннән 21 км ераклыкта булган. Оператив хезмәтләргә иллеләп кеше шалтыраткан.

Сейсмик активлык магнитудасы 4,4 булган. Җир 10 км тирәнлектә тетрәгән.

Җимерелүләр, үлүчеләр һәм имгәнүчеләр турында әлегә мәгълүмат юк.

2018 елның 5 сентябрендә Башкортстан территориясендә 5,5 магнитудалы җир тетрәү булган иде. Вакыйга Уфадан 133 км ераклыкта Уралда булды. Ул вакытта да җир тетрәү 10 км тирәнлектә теркәлде.