Баласын бака белән чагыштырган анадан балаларын йолып алганнар
Баласын бака белән чагыштырган анадан балаларын йолып алганнар
Амур өлкәсендәге Ивановка авылында яшәүче хатын-кызның ике баласын йолып алганнар. Сәбәбе - анасының бер яшьлек сабый кызын корымга буялганы өчен кыйнавы. Бу хакта хәбәр өлкә прокуратурасы сайтында урнаштырылган.
Баласын кыйный-кыйный кычкырган ананы сурәтләгән видео 4 августта "Амур.Инфо" агентлыгында чыкты. Бала чишенгән, анасы аңа әшәке сүзләр кычкыра, кимсетеп үрти. Бала елый.
"Акырма! Хәзер сугып очырам! Җүнсез! Аңгыра бака син. Чын хайван", - дип кычкыра хатын баласына. Бер мизгелдә баланың елаудан тыны кысыла башлый, анасы исә "Әйдә, буыл" дип кычкыра, аны тарак белән кыйный, йөзен тотып чеметә.
Ана кешенең баласын кыйнавын бу гаиләнең танышы күзәтеп торган. Аны да, чара күрмәгәне өчен, җавапка тартачаклар. Язмадан аңлашылганча, кадр артындагы кеше баланы пычрак дип атый.
Ивановка авылы башлыгы Валентина Ольшевская сөйләвенчә, ана кеше администрациягә килгән, үзенә ярдәм, терәк һәм яклау сораган.
"Бу хәл килеп чыкканда ана кеше исерек булган һәм кызын мичкә кереп пычранган өчен сүккән. Хәзер ул кайгыра, балаларын кайтаруларын сорый", - дип сөйләгән Ольшевская.
Үз вәкаләтләрен тиешенчә үтәмәгән анага алкогольга бәйлелектән дәваланырга кушканнар, әлегә исә балаларны куркынычсыз урынга алып китүләрен аңлатканнар.