Авылда төнлә бүреләр йөргән
Бүреләр бәйдә торган этне үтереп ашаудан да чирканмый. Шуңа күрә авыл халкына этләрен яшерергә киңәш итәләр.
Коми республикасында күзәтү камералары авыл буйлап йөргән бүреләр чирүен төшереп алган. Бу турыда «Вести» каналы күрсәтте.
29 ноябрьдә Ыб дигән авылда төнлә бүреләр йөргән. Кадрлардан күренгәнчә, ерткычлар зур мәйданны биләп таралышып бара. Башта ата һәм ана бүре килә, алардан соң чирүнең гади әгъзалары бара. Чирү артыннан аксак һәм хәлсез бүре килә.
Барысы җиде бүре булуы билгеле. Ерткыч җанварларның шулай күпләп авылга килүе кешеләрне куркуга салган. Чөнки бүреләр саны бу чирүдән дә күбрәк булырга мөмкин икән.
Ыб авылы администрациясе аучыларга мөрәҗәгать иткән. Авыл халкын сак булырга чакыралар. Аеруча этләрне яшерергә киңәш итәләр. Чөнки бүреләр бәйдә торган этне үтереп ашаудан да чирканмый, диелгән әлеге хәбәрдә.