17 яшьлек мәктәп укучысын бер төндә биш ир-ат көчләгән

Петербургта 17 яшьлек мәктәп укучысын бер төндә биш ир-ат көчләгән. Бу турыда «Московский комсомолец» сайты хәбәр итә.

Югары сыйныфта укучы кыз бала социаль челтәрләрдә бер егет белән таныша. Ул бу егет белән төнге шәһәр буйлап йөрергә ризалаша. Егет кызны исертә һәм өенә алып кайта. Өйдә аның өч дусты да була.

Санкт-Петербургның хокук саклау органнары төркемләп көчләү турында җинаять эше ача. Бу эшне 27 яшьлек ир-ат оештырган, дип хәбәр ителә.

Кызның ярдәмсез булуын файдаланып, яшь ир-ат аның белән җенси мөнәсәбәткә керә. Шуннан соң тагын өч ир-ат та кунак кызны көчли.

Җаваплылыктан курыккан өй хуҗасы кызны урамга чыгарып куя. Ул балигъ булмаган исерек кызны кар көрте өстендә калдыра. Соңрак бу кызны узып баручы такси йөртүче күреп ала. 36 яшьлек ир-ат та баланы машинага алып кереп көчли. Шуннан соң автобус тукталышына илтеп куя.

Көчләнгән кыз баланы иртә белән узып баручы кешеләр табып ала. Салкында озак яткан кызда пневмония булуы ачыклана.

Тикшерүнең башлангыч версиясе буенча, балигъ булмаган кызны көчләүдә таксистны гына гаеплиләр. Фатир хуҗасы баланы куркынычта калдыруда гаепләнә. Аны бер елга ирегеннән мәхрүм итүләре ихтимал. Полиция хезмәткәрләре бу ир-атның өч дустының гамәлләрендә законсыз эш бар дип тапмаган, диелгән әлеге хәбәрдә.