"Әни, табибларга ничек ышамыйсың инде?": Теш алдырганнан соң, 17 яшьлек егет вафат булган

9 ноябрь 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Фото: https://pixabay.com
Тувадан Мәскәүгә күченеп килеп, педагогика университетында белем алучы 17 яшьлек Денис теш алдырганнан соң вафат була. Ул математика укытучысы булырга хыялланган. Ләкин стоматологка бару аның бөтен тормышын чәлпәрәмә китергән. 

Август азагында 17 яшьлек Денисның теше сызлый башлый. 1 сентябрьгә барырга җыенганда теш сызлау бер дә җайлы вакыт булмый. Ул әнисе белән киңәшә дә, тешен дәваларга була. Бу турыда "Комсомольская правда" хәбәр итте.

"Клиниканы интернеттан таптык. Табиб янына бергә бардык. Дениска рентген ясадылар, тешне алып ташларга кирәк диделәр. Мин гаҗәпләндем, ник дәваламыйлар икән дип уйладым. Аннары карыйм, алып аткан теш урынына җөйләр теккәннәр, янында җимерек теш, анысына пломба куйганнар. Ә бу нормаль, сәламәт теш. "Мин аңа очраклы рәвештә тиеп киттем", - ди табиб. Мин ачуландым, тешкә ник тигәннәрен беләсем килгән иде. Тик улым мине алып чыгып китте", - дип сөйли мәрхүм егетнең әнисе Анна.

Анна белән Дениска дарулар исемлеге тоттыралар, алар дәвалау өчен түли һәм чыгып китә. Төнлә егет авыртудан уянып китә, алып атылган теш урыны сызлый. Авыртуны баса торган дару эчәләр. Ике көннән егетнең яңагы шешеп чыга.

"Без тагын стоматологиягә киттек. Табиб-хирург Денисның авызында сәгать ярым актарына, теш казналыгын ача. Башта уколсыз гына эшләделәр. Улым зур булса да, елап җибәрде. Анда ни булган - табиб аңлатып тормады. "Мин чистарттым, яңа кан җибәрдем. Башка авыртмаска тиеш", - диде. Белмим инде, ни чистарткандыр", - дип уфтана Анна.

Хирург Дениска тагын бер атнадан килеп күренергә куша. Аның хәлен, тешләренең торышын күзәтеп торырга кирәк, ди. Ләкин үсмер бераздан авызын да ача алмый, яңагы тагын шешеп чыга.

"Табиб сүзләренчә, бу узарга тиеш, башка тешләрне дәваларга кирәк иде. Мин улыма башка стоматологка барырга тәкъдим иттем. "Әни, табибларга ничек ышанмыйсың инде? Табиблар - белгеч. Аларга ышанмасаң ничек яшәргә кирәк?", - диде улым", - дип сөйли Анна.

Бер көнне Денисның борыныннан кан китә, ашыгыч ярдәм чакыралар. Аны Сперанский исемендәге хастаханәгә алып китәләр. Егеттә геморрагик шок була, гемоглобины төшә. Табиблар теш казналыгы астында абсцесс булуын ачыклый.

"Мин аны хастаханәдә танымадым инде. Санаулы сәгатьләр эчендә балам бөтенләй үзгәрде. Бу вакытта ул дарулар эчә иде. Үлгәннән соң, аның рюкзагын караган идем, анда градусник, дарулар бар иде", - дип сөйли Анна.

"Без мәетне өйгә алып кайтып барганда, Денисның телефоны шалтырады. Балага стоматология шалтырата, аны теш дәваларга чакыралар. Аның үлеме турында белеп алгач ук, миңа башка шалтыратмадылар. Балалар башка болай үлмәсен иде. Ник сәламәт балам үлде? Без укырга кергәндә барлык справкаларны җыйдык. Ник табиб очраклы рәвештә сәламәт тешне имгәткән? Ул пломба салырга хокуклы идеме? Килешүдә бу язылмаган бит", - ди Анна. 

Хәзерге вакытта җинаять эше ачылган. Тикшерү бара.

  Без Инстаграмда

Фикерләр








БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла