Чиле-пешле йомырканы ничек пешерергә

1 февраль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Фото: Рамил Гали
Файдаланыр алдыннан, йомыркаларны яхшылап юарга кирәк. Чөнки кабыгында зарарлы микроблар күп булырга мөмкин.

Бозылмаганмы икәнен белү өчен, тозлы суга салып торырга була. Бозылган йомырка су өстенә калкып чыгачак.

Пешкән йомырканы чи йомыркадан аеру бик җиңел. Өстәл өстендә әйләндереп җибәрсәң, пешкән йомырка бик озак әйләнә, ә чи булса, бер-ике тапкыр бөтерелә дә туктый.

Чиле-пешле йомырка пешерү өчен, мәсәлән биш йомырка әзерлисе булса, уртача зурлыктагы кәстрүлгә ике стакан чамасы су салырга һәм плитәгә ут өстенә куярга.

Йомыркалар ярылмасын өчен, суга бераз тоз салырга кирәк. Су кайнап чыккач, аш кашыгы белән сак кына йомыркаларны кәстрүлгә урнаштырырга. 3-5 минут чамасы пешкәннән соң, утны сүндерергә һәм йомыркаларны аш кашыгы ярдәмендә судан алырга. Суынмасын өчен, һәрберсен кәгазь салфеткага төреп куеп торырга.

Чиле-пешле йомырканы тоз сибеп, май ягылган ипи белән ашарга мөмкин.

Әгәр йомырканы каты итеп әзерләргә уйласагыз, кайнап торган суда 10 минут пешерергә кирәк. Кабыгын чистартырга җиңел булсын өчен, пешкән йомыркаларны 5 минутка салкын суга салып торыгыз. Каты итеп пешкән йомырканы, гадәттә, салатларга салалар. Шулай ук, юлга чыкканда үзең белән алу өчен дә бик уңайлы ризык.

Тәбә пешерү өчен, кирәк кадәрле санда йомырка алып, ватарга һәм эчен тәлинкәгә агызырга кирәк. Йомырканы ватканда, кырыена сак кына пычак белән төртеп, кабыгын икегә аерырга һәм эчен тирән тәлинкәгә агызу хәерле. Турыдан-туры әзерли торган савытка ватарга ярамый. Чөнки бозылганы да эләгүе бар. Сайлап алынган йомыркаларны тирән эчле савытка салып барасы була. Шуңа бераз тоз, төрле тәмләткечләр, сөт өстәп, яхшылап болгатырга кирәк. Миксер файдаланырга да була.

Утта кыздырылган тирән эчле табага бераз үсемлек мае салырга, шунда йомыркалы катнашманы агызырга кирәк. Шуннан соң, табаны уттан алып, духовка куярга һәм пешереп бетерергә була. Йомырка тәбәсе 15-20 минут эчендә әзер була.

Фикерләр








БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла