" /> Журналист Чулпан Шакирова Казандагы матәм чарасы турында: Ил кайгысын үз кайгысы итеп кабул иткән яшьләрне күреп, горурланып еладым...

Журналист Чулпан Шакирова Казандагы матәм чарасы турында: Ил кайгысын үз кайгысы итеп кабул иткән яшьләрне күреп, горурланып еладым...

27 Марта 2018

Автор: Чулпан ШАКИРОВА
Фото: Рамил Гали, Илнар Төхбәтов
Бүген Казанның Бауман урамында Кемерово фаҗигасендә һәлак булган корбаннарны искә алдылар. "Татар-информ" хәбәрчесе бу матәм чарасында катнашты.

Кем ничектер, Кемероводагы “Кышкы чия” сәүдә-күңел ачу үзәгендә балалар янып үлүен ишеткәч, минем хәтердә Беслан фаҗигасе яңарды. Аерма шунда гына: 25 март фаҗигасе теракт түгел (диләр), аны булдырмый да калып була иде. Тыныч тормышта, бар нәрсә пульт белән генә идарә ителә торган заманда, дүрт катлы сәүдә үзәгеннән чыга алмыйча янып үл әле син! Аяныч: әле үлемнең ни икәнен дә белмәгән балалар, әҗәлләре белән күзгә-күз очрашып, якыннары белән хушлаша.


Кемерово фаҗигасе турында кем кайчан, ничек ишеткәндер... Минеке болай булды. “Тандем” сәүдә үзәге каршында гына яшибез без. Ирем белән бер сәгать элек кенә шуннан чыгып, төшке аш әзерләп, ашарга утырдык.  Ул да булмады, урамда сирена тавышлары яңгырый башлады. Балкон тәрәзәсе ачык иде, рупордан кычкыру тавышлары да яңгырады. Тәрәзәгә йөгереп килсәк, урам тулы халык, “Тандем” ягыннан өер-өер агылалар. Ашыгыч ярдәм, газ хезмәте, янгын сүндерү машиналары чабыша. Аяк асты пычрак, халык аны-моны карамый, балалар егыла, әниләре аларны күтәреп ала да тагын йөгерә.

Бүлмәгә йөгереп кереп, телефонымны алып, “Татар-информ” сайтын ачам. Әле бу вакытта “Тандем” турында бер хәбәр дә юк.  Яңалыклар лентасында беренче хәбәр булып Кемерово фаҗигасе тора. Менә эш нидә икән! "Тандем"дагыларның, хәбәр килеп ирешү белән, саклык чарасы күреп, эвакуация планын эшләтеп җибәрүләре икән.

Ярты сәгать дигәндә, социаль челтәрләр Кемерово фаҗигасенең яңадан-яңа хәбәрләре, фотолары белән тулды.

“Каникул башлану хөрмәтенә, төрле авыллардан балаларны автобуслар белән алып килгәннәр икән...”, “кинозалда бикләп калдырганнар...”, “балалар ишектән чыга алмыйча янып үлгән...”, “бу бина элек склад булган, шуңа тәрәзәләре дә булмаган...”...булмаган, булмаган, булмаган... Кичкә таба бу хәбәрләр тагын да куерды. Әлеге фаҗига берәүне дә битараф калдыра алмый иде.


Иде...

Шулай да мондый зур фаҗигане беркадәр дөнья күргән, үзләре әти-әни булып, бала сөю бәхетенә ирешкән йә булмаса якыннарын югалтучылар гына йөрәк аша үткәрә ала дип уйлый идем. Ялгыш уемнан кире кайтам һәм гафу үтенәм! Бүген Кемерово фаҗигасе корбаннарын искә алу чарасына Казанның Бауман урамына  җыелган, ил кайгысын үз кайгысы итеп кабул иткән яшьләрне күреп, горурланып еладым. 

Казанның Бауман урамындагы матәм чарасына килүче-китүчеләрне санасаң, ике йөздән артык кеше булгандыр. Һәм аларның 90 проценты яшьләр иде! Студентлар, яңа эшли башлаучылар. Иң гаҗәбе - аларны монда берәү дә мәҗбүриләп, куып китермәгән. Араларында балавыз сыгучы кызлар гына түгел, ир-егетләр дә чамасыз. Аларның икесенең берсе чәчәкләр һәм йомшак уенчыклар белән килә. 

Күрше – күршесенең хәлен белми, кайгысын уртаклашмый торган заманда, битарафлык битлеген салып, меңнәрчә чакрым ераклыкта килеп чыккан фаҗигагә җавап итеп яшьләр җыелды бүген. Ил кайгысын кайгы иткән яшьләр – бу бит илебезнең киләчәге дигән сүз!


Татарда искә алу, шәм кую гадәте юк диярсез. Килешәм. Әмма матәм чарасына килүченең берсенә дә мәҗбүриләп шәм тоттырмадылар. Күз яшьләре аша дога кылып торучы мөселман егет-кызларын да күрергә була иде монда.


...Халык арасын ерып, кайтыр юлга чыкканда, тагын бер кат артыма борылып карадым һәм имәнеп киттем. Матәм чарасы нәкъ “Кольцо” сәүдә-күңел ачу үзәгенең каршында узды. Фәрештәләрнең "амин" дигән минутына туры килмәсен, тик шулай да... “Кольцо”да янгын-мазар чыга калса, үлем котылгысыз. Сәүдә үзәге каршындагы тау булып өелгән чәчәкләр өеме һәм шәм яктысында “Кольцо” тагын да дәһшәтлерәк күренде...



"Татар блогерлары" сәхифәсендә язылган фикерләр редакция фикерләре белән туры килмәскә мөмкин. 

Фикерләр








Татар блогерлары

Салих Гайнетдинов: Көрәштә бүләкне шобага тотып уйнатуны уйлап чыгаручылар көрәшчеләрнең милли генофондыбыз икәнен аңлый микән?

Чабаксарда узган федераль сабан туенда һәм Федераль авыл сабан туенда көрәштә төп приз - автомобильне жирәбә белән уйнатуга, бу лотереяга Татарстан спортчыларын кертмәүгә бәйле гауга дәвам итә. Салих Гайнетдинов Facebook социаль челтәрендә үз фикерен язды. Шуны, аның рөхсәте белән, "Интертат" укучыларына тәкъдим итәбез.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла