Булачак журналист Талия Төхфәтуллина: Уфа каласы ни өчен матур?

8 июль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Талия ТӨХФӘТУЛЛИНА
Фото: соцчелтәр, ufacity.info
"Интертат" электрон газетасында яшь хәбәрчебез язмасын укыгыз. Арча мәктәбенең 11нче сыйныф укучысы Талия Төхфәтуллина Уфага сәяхәттән соң кичерешләре белән уртаклаша. Киләчәктә ул татар журналисты булырга хыяллана.

Җырларда макталган, үзенең татлы балы, моңлы курае белән бөтен дөньяда дан тоткан, мәңге үлемсез батыры – Салават Юлаев белән горурланып яшәүче гүзәл Уфа... Нихаять, әлеге шәһәрдә безгә, “Нур” балалар телестудиясенә дә булырга туры килде!

Иртәнге сәгать биш, шәһәр әле уянмаган, ә безне – Татарстан делегациясен – инде көтәләр! Вокзал ишек төбеннән каршы алып, юл буе шәһәр турында кызыклы легендалар сөйли-сөйли, кунакханәгә юл алдык. Кемгә генә кадерле кунак булып йөрү ошамас. Безнең дә беренче тәэсирләр искиткеч иде! Димәк, шәп булачак!

Дөрестән дә, Уфада узган көннәр берсеннән-берсе кызыклы һәм файдалы булды. Беренчедән, без быел 13 нче тапкыр узучы “Включайся” балалар телевидениесе фестиваленең лаеклы катнашучылары; икенчедән, рәсми рәвештә эшләүче студияләрнең үз хәбәрчесе ролендә башкорт брендлары (“Бал”, “Курай”, “Салават Юлаев” һ.б.) турында сюжетлар төшерүдә катнашу бәхетенә ирештек. Шулай ук танылган тележурналистлардан осталык дәресләре алу, рәхәтләнеп күңел ачу, тугандаш башкорт халкының мәдәни дөньясы белән якыннан танышу... Ә минем өчен иң истәлеклесе - БСТ телеканалының “Тау-тау хәбәр” тапшыруында туры эфирга чыгу булгандыр, мөгаен. Мондагы якын һәм җылы мохит мизгел эчендә бөтен каушауларымны юкка чыгарды. Әйтерсең, мин иң якын дусларым арасында, алар өчен үз кеше. Анда мин фестиваль, Уфа турындагы сорауларга җавап бирдем, һәм, әлбәттә, үзебезнең Арча, “Нур” студиясенең эшчәнлеге белән дә таныштырдым.

“Включайся” фестиваленең Уфада уздырылуы гаҗәп түгел, чөнки монда балалар журналистикасына зур игътибар бирелә, үзләренең рәсми рәвештә эшләп килүче “Тамыр” балалар телеканалы да бар. Аның башкорт телевидениесе үсешендә мөһим роль уйнавын без үз күзләребез белән күрдек. Фестивальдә күпчелек Мәскәү, Петербург, Ярославль кебек эре шәһәрләрән килгән рәсми телеканаллар катнашты. Алар арасында без, кечкенә генә Арча шәһәренең кайда да балкырга тырышучы “Нур” студиясе, республикабыз, районыбыз йөзенә кызыллык китерми, үзебезне лаеклы күрсәтеп кайттык. 

Өч көн, өч төн... Шәһәрне, аның кешеләрен яратып калу өчен шул да җитә икән. Мөмкинлек чыкса, мин монда тагын киләм әле. Чөнки Уфа киләчәктә тагын да матурланачак. Ул халыкара конференцияләр һәм конгресслар үткәрергә җыена, шуңа күрә монда шактый төзелекләндерү эшләре башланган. Ә шәһәрнең безнең кебек бик күпләрне җәлеп иткән төп матурлыгы – аның гаҗәеп гади, ачык йөзле һәм кунакчыл кешеләре.

Башкортстанга кунакка килсәгез, бер буш сумка онытмагыз! Чөнки моннан сезне күчтәнәчсез кайтармаслар. Менә безгә дә ярты чемодан бал тутырып җибәрделәр. Баллы күчтәнәчләр һәм татлы хәтирәләр белән мәңге истә калырсың, Уфа!

Фикерләр








Татар блогерлары

Татар Швейцариясе яки Швейцария Татарстаны – Актаныш районы Сабан туе Магнитогорск татарлары күзлегеннән

Быел Актаныш Сабан туенда Магнитогорсктан “Татар рухы” дип аталган “Татарларның милли-мәдәният оешмасы” вәкиле Рафаил Мөхәммәдшин  беренче тапкыр катнашкан. “Интертат” электрон газетасы өчен язылган блогында ул Актанышның ни өчен Татар Швейцариясе исемен йөртергә лаек булганын аңлата.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла