Безнең заман герое: "Татагролизинг” агрофирмасының терлекчесе Роза ханым Гафиятуллина

12 июль 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Раиф ГЫЙМАДИЕВ
Лениногорск районының Мичурин авылы терлекчесе Роза ханым Гафиятуллина турында “Ферманы саклап калучы”, диләр. Вак хуҗалыкларны берләштерү, үзәкләштерү чорында Мичурин авылы фермасын да ябырга карар кылган булганнар. Ләкин орчык кадәрле генә гәүдәле Роза апаның тынгысызлынып бөтерелүе, барысын да эшкә күтәрүе җитәкчелекне ул уйдан кире кайтырга мәҗбүр иткән.

“Татагролизинг” акционерлык җәмгыяте идарәсенә караган “Лениногорск” агрофирмасының Мичурин бүлеге фермасында үгезләр симертелә. Җитештерү күрсәткечләре сокланырлык – терлекләрнең тәүлеклек артымы берәр килограммга кадәр җитә. Әлеге уңышлар, әлбәттә, иң элек ферма мөдире Роза ханым Гафиятуллина һәм аның коллективы хезмәте нәтиҗәсе. 

Бу көннәрдә Роза апа олуг юбилеен билгеләп үтте, аңа инде 70 яшь тулды. Тик ул ял итү турында уйламый да. Ару-талуны белмәс тынгысыз җан Роза Гафиятуллина, хезмәттән яшәү көче табып, әле дә орчык кебек бөтерелә бирә.

Сигезенче сыйныфны тәмамлагач та, 1965 нче елның июнендә тәүге тапкыр фермага эшкә килә Роза Гафиятуллина. Шул вакыттан бирле инде 54 ел гомер узып киткән. Роза апа Гафиятуллина туктаусыз хезмәттә, бүген дә яраткан эшендә. Әгәр терлекче хезмәтен, малларны дөрестән дә яратмаган булса, шул чаклы түзә алган булыр иде микән? Терлекче хезмәте бигрәк кыенга туры килгән бит. Сыерларны кул белән сауганнар, басудан терлекләргә азык чабып алып кайту, ат белән сенаж, фураж ташу – барысы да савымчылар җилкәсендә булган.

- Кичке савымны тәмамлап кайтып, йорт мәшәкатьләреннән соң башны мендәргә тидерәсең генә, иртәнге савымга вакыт җитә, - дип искә ала Роза ханым. Иртәнге чык белән ашагында, сыерлар сөтлерәк була дип, терлекләрне иртәнге биштән үк көтүгә алып китә торган булганнар. Аңарчы сыерларны савып өлгерергә кирәк бит. Барлык хезмәт кул көче белән башкарылган.

Шундый авыр хезмәт юлын үтеп, әле ул гына түгел – гаиләдә алты бала анасы булып, аларны тәрбияләп үстереп, инде җитмеш яшен тутырса да, әле һаман җитештерүчән хезмәттә: фермалар бетмәсен, авыл халкына эш булсын дип янып яшәүче Роза апа Гафиятуллинаны чорыбыз герое дип атарга тулы хак бардыр. Ул җитәкчелек иткән Мичурин бүлеге фермасында бүген 500 башка чаклы терлек симертәләр. Хезмәт нәтиҗәләре буенча ферма районда иң алдынгылардан санала.

Үзара хөрмәт, коллективта аңлашу булганда гына, яңа хезмәт үрләре яуларга мөмкин бит. Ә ул мохиткә ирешү җитәкченең осталыгына нык бәйле. Роза апа җитәкче буларак та колликтив алдында зур абруйга ия.

- Элеккеге белән чагыштырганда, хәзер терлекче, сыер савучы булып эшләүнең бер авырлыгы да юк. Мондый шартларда начар эшләү оят, - ди Роза апа, агрофирмадагы терлек торакларының заманча җиһазланган булуын, җитәкчелекнең хезмәт өчен уңай шартлар тудыруын искәртеп. Һәм 70 яшендә булуга карамастан, яшьләргә үрнәк булырлык итеп эшли дә. Бик күп мактау грамоталарына ия инде ул. Хезмәт даны ордены кавалеры да. Ә күптән түгел генә республиканың аграр тармак алдынгылары белән бергә аны да Казанга чакырып, Татарстан авыл хуҗалыгы һәм азык-төлек министры Марат Әхмәтов бүләкләгән. 100 мең сумга сертификат тапшырган министр үзенә.

-Казанга чаклы чакырып, министрның тәбрикләве яңа көч-дәрт өстәде. Җәмгыять өчен кирәклегемне тойдым. Саулык булганда, эшләрмен әле, - ди Роза ханым Гафиятуллина.


  Без Инстаграмда

Фикерләр








Авыл

Фишман паркы, ике катлы йортлар һәм ачык капкалар: Кукмараның Вахите - татарның иң бай авылларының берсе

«Там гора, тут гора, уртасында Кукмара» дигән сүзне һаман кабатлап йөрим әле. Кайсы якка карама - тау тау. Үземне Урал тауларына сәяхәт итеп кайткан кешедәй хис итәм. Аннары тагын Кукмара киез итеге, Кукмара шәле, Кукмара табасы дигән нәрсә дә бар бит әле. Данлыклы Вахит авылы, данлыклы Вахит колхозы турында да ишеткән бар иде. Йөз кат тыңлаганчы, бер тапкыр күрүең яхшы диләр бит. Кукмараның гына түгел, Татарстанның да бренды була алырлык Вахит җирлегендә күргәннәремне язып китәргә булдым.

Авыл

Илдус Хатыйпов: Авыл хуҗалыгындагы бөтен проблемалар да хисап булмаганнан

Мал табибы Илдус Хатыйпов “Татар-информ”га интервьюсында бүгенге авыл хуҗалыгына анализ бирде, сөтне ничек арттырырга, ничек итеп ашатырга, авылга кадрларны ничек кайтарырга кирәклеге турында сөйләде.

Авыл

Дамир Фәттахов авыл яшьләренең тәнкыйтен кабул итте: "Әйе, җиренә җиткереп эшләмибез..."

Авыл яшьләренә ни кирәк? Торак, тәҗрибәле фермерлардан остазлык, авылда өч балалы, пособиегә өмет итә алучы әниләрнең яшен 29 дан 35 кә кадәр арттыру, эш башлаучы фермерларга ярдәм, модульле кош абзарлары... Бүген алар шушыларны сорый. Авыл хуҗалыгы һәм азык-төлек министры яшьләр белән эшләү үрнәген күрсәтте, Яшьләр эшләре министры кимчелекләрен танырга мәҗбүр булды.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла