Кәтлит белән кыстыбый
Кәтлит белән кыстыбыйны һәркем үзенчә ясый. Мин дә үзем яратып ясый торган рецептны тәкъдим итәм.
Камыр өчен: ярты стакан кайнар су, ярты стакан салкын су, 3 аш кашыгы тәмле майонез, бер чеметем тоз, он.
Кыстыбый эчлеге: бәрәңге, суган, тоз, борыч, сөт, атланмай.
Камырның ингредиентларын салып басарга, коры табада пешерергә. Бу камыр катып та китми, пешкәч сынмый да.
Эчлек өчен тозлы суда пешкән бәрәңгене изәргә, кайнар сөт, борыч, атланмайда кыздырылган суган салырга һәм яхшылап изәргә. Аннары камыр эченә боламык җәяргә һәм атланмай белән майларга.
Кәтлит өчен: 300 г сыер итеннән фарш, 1 эре суган, тоз, борыч, 2 кисәк сөттә җебетелгән батон, 1 аш кашыгы манный ярмасы. Барлык ингредиентларны салып яхшылап болгатырга һәм ярма бүртсен өчен 15 минут тотарга. Кайвакыт кәтлит таралып яки ярылып китә, ә манный ярмасы формасын саклаячак.
Тәмле булсын!