Рамил Шәраповны әллә кемнәргә охшаталар, ә ул үзен бик матурга саный
Рамил үзен бик матур дип саный. Ямьсез булсам, без синең белән охшаш, дип көн аралаш миңа фотолар җибәреп тормаслар иде. Һәркемнең матур кешегә охшыйсы килә бит, - дип шаярып елмая Рамил Шәрәпов.
- Рамил, үзеңә охшаган кешеләрне еш очратасыңмы?
- Әйе, без синең белән охшаган, дип фотосурәтләр җибәреп кенә торалар. Кичә "Дикий ангел" сериалында Глория булып уйнаучы кызны төшереп җибәргәннәр. Карап-карап торам да чынлап охшашканбыз бит!
Мине гомер-гомергә Данир Сабиров белән дә бутыйлар иде. Хәзер бутамаслар инде, Данир колакларын турайтты.
- Бөтенесе матурлана, синең дә колакларыңны турайтасың килмиме соң?
- Юк, колакны турайтырга исәбем дә, теләгем дә юк. Колакны турайтсам, борын гына утырып калачак.
- Операциядән соң Данирның борыны йодрык кадәр калган кебек тоелмадымы?
- Кешенекен тикшермим! Үземнеке дә Аллага шөкер генә, җитәрлек.
- Син үзеңне матур кеше дип саныйсыңмы?
- Мин бик матур! Тик нигәдер көзге генә көнләшә, дөресен күрсәтми (көлә).