Казан укытучысына ярдәм кирәк: "Бер күкрәгемне алдыргач, көн саен икешәр кило авырлык югалтам”

5 Февраля 2018

Укылган: 2469 тапкыр

Автор: Чулпан ШАКИРОВА
Фото: Әлфия Шакирова архивыннан
Казан кооператив институты укытучысы Әлфия Шакирова икенче стадия күкрәк яман шеше белән көрәшә.

Йөгереп йөргән җирдән ялгыш кына сөртенергә, шуннан имгәнеп калырга мөмкинсең. Гомер буе бармагы да сызлап карамаган имәндәй таза кешеләр дә кинәт чирләп китә. Башта бернинди билгесе булмаган чир тиз арада мәкерлегә әйләнергә мөмкин. Казан кооператив институты укытучысы, 2015-16 елларда “Иң яхшы укытучы” грантына лаек булган Әлфия Шакирова да – мәкерле чир корбаны. Ул күкрәктәге яман шештән интегә. Бу көнгә кадәр туганнарыннан да, институт коллективыннан да яшереп килгән әле ул үз хәлен. Тик вакыт тиз уза, чир көннән-көн баш күтәрә. Инде Әлфия ханымның уң күкрәген алганнар, бүген ул химия терапиясе уза.

Әлфия Шакирова – Казан кызы. Шунда туып-үскән, гомере шунда үткән. Мәктәпне тәмамлаганнан соң ул, балачак хыялын тормышка ашыру өчен, Педагогия институтына укырга керә. Актив, чая, ут кызны төркем старостасы итеп куялар, комсорг итеп сайлыйлар. Университетны кызыл дипломга тәмамлап, үзе укыган мәктәпкә математика укытучысы булып кайта. Һәрвакыт үсешкә, яңалыкка омтыла фән укытучысы. 13 ел мәктәптә эшләгәннән соң аны сәүдә-икътисад техникумына чакыралар. Ул техникумда 12 ел хезмәт куя. Инде тормышының яңа этабына керешеп, Казан кооператив институтында югары математика укыта башлый. Тик биредә ике ел гына эшләп калырга өлгерә ул. Мәкерле чир аяк чала.


–Мин сәламәтлегемә бармак аша гына караучылардан түгел. Табиблар янына даими йөреп, тикшеренеп торам. Аннан соң безгә эштән дә ел саен медицина тикшерүе узарга кушалар. 2016 елның ноябрендә маммологка күрендем, барысы да әйбәт, бер генә дә шикләнерлек урын юк иде, – ди Әлфия ханым.

Яңа уку елы башланыр алдыннан - август аенда укытучылар кабат медицина тикшерүе уза. Менә шунда табыла да инде өч хәрефле бу зәхмәт. Әлфия ханым бу хәбәрне өстенә бозлы су койгандай кабул итә.

–Тикшерелмәгән булсам, мин аның турында белми дә яшәгән булыр идем, бәлки. Чөнки күкрәгем авыртты, борчыды дип тә әйтә алмыйм, – ди педагог.

Дәвалаучы табибы аңа авыру рекордлы тизлектә үскәнен әйтә. Моның нинди дә булса стресс нәтиҗәсендә килеп чыгуын да искәртә.

– Чыннан да, мин зур стресс кичердем. Ашыгыч ярдәм белән хастаханәгә алып китеп, бер тәүлек дигәндә әнием вафат булды. Мин ул вакытларда берни тоймадым, сизмәдем, яшәмәдем дә дияргә дә була. Бик зур югалту, бик зур стресс булды бу минем өчен. Табиб та: “Яман шеш күзәнәкләре шул вакытта баш күтәргән булуы ихтимал”, – ди.

Әлфия Шакирова үзендә чир тапсалар да, тешен кысып, яңа уку елын яраткан эшендә – студентлары белән башлый. Тик 12 октябрьдә эштән туктарга мәҗбүр була ул. 16 октябрьдә исә беренче тапкыр пычак астына ята – уң күкрәген алалар.

170 см буйлы, гомер буе 75-77 кило йөрсә дә, сылу гәүдәле ханым була ул. Тик мәкерле чир аны тиз арада ашый башлый.

– Бүгенгә мин 23 кило авырлык югалттым. Һәр көн саен ике килога ябыгам, – ди Әлфия ханым, авыр сулап.

Әлфия Шакирова бүген химия терапиясе узарга мәҗбүр. Чөнки авыруының организмга таралуына юл куярга ярамый. Моңа кадәр ул өйдә дәваланса, кичә кабат хастаханәгә керергә мәҗбүр булган. Чөнки тән температурасы 39 градустан төшми, инде үпкәләре дә авырта башлаган.


Ире һәм оныгы белән

Әлфия Шакированың көчле математик, көчле укытучы икәнен дә әйтеп үтәргә кирәк. Ул республиканың математиклар берләшмәсе җитәкчесе. Аның укучылары фән олимпиадаларында уңышларга ирешкән. Соңгы елларда Әлфия Фәйзрахман кызы репетиторлык белән дә шөгыльләнгән, зур тәҗрибә һәм бай белем багажына ия укытучыга Казанның төрле почмакларыннан укучылар белем күтәрергә йөри. Әйтергә кирәк, Әлфия ханымда шөгыльләнгән укучыларның БДИ баллары да югары.

Тик ничә еллар буе укучыларга, әти-әниләргә ярдәм кулы сузып яшәгән Әлфия Фәйзрахман кызы бүген үзе ярдәмгә мохтаҗ.

– Мин гомердә дә нидер сораганым булмады. Озак вакыт авыруым турында әйтергә теләмәү, яшерү дә шуның белән бәйле. Тик хәзер хәлем көннән-көн начарая. Ирем тимер юлда төзәтү поездында эшли. Олы кызым Айгөл кияүдә, үз гаиләсе белән яши. Кечкенәсе Айсылу сәүдә-икътисад техникумында укый. Укудан соң “Бәхетле”дә төргәкләүче булып та эшләп ала. Сәгатенә 50 сум түлиләр. Укудан соң күпме эшли ала инде ул, ике-өч сәгать. “Әни, сиңа җиләк-җимешкә җитәрлек булса да эшлим”, – ди балакаем. Өй дә аның өстендә. Ашарга пешерү дә, җыештыру да аның җилкәсендә, – ди Әлфия ханым күз яшьләре аша.


Ике кызы, кияве һәм оныгы белән

Әлфия Шакированың химия терапиясе узуын әйтеп узган идем. Бер курс – 80 мең сум. Дүрт курска түләп куйганнар инде. Ә аның күпме кирәк буласын берәү дә белми. Химиядән соң организмны тикшерү өчен дә зур акчалар кирәк булачак.

– Хәйрия язмаларын гел укып бара идем. Кемгәдер фәлән йөз, икенчеләренә миллионнар да соралды. Кулымнан килгәнчә, ярдәм кулы да сузып бардым. Әмма кайчан да булса үземә дә ярдәм сорармын дип уйлаганым булмады. Дәвалану өчен миңа кирәкле төгәл сумма юк. Шуңа күрә, кем күпме булдыра ала, шулай ярдәм итсәгез иде. Аллага шөкер, авыруның башлангыч стадиясе булгач, барысы да вакытында, уңай хәл ителер дип өметләнеп яшим. Иң зур байлык – сәламәтлек! Ходай беребезне дә шуннан аермасын, – ди Әлфия Шакирова.

Әлфия Шакировага ярдәм итәргә теләүчеләр өчен “Сбербанк” картасы номеры: 5469620014257438

P.S. Әле бер биш ел элек кенә матбугатта хәйрия язмалары басылмый, язмыш сынавы алдында калучылар авыру белән кара-каршы утырып кына көрәшә иде. Шөкер, замана үзгәрдеме, кешеләреме, хәйриячелек хәзер модага әйләнеп бара. “Интертат.татар”сайтында да хәйриячелек язмалары даими басыла һәм ярдәм итәргә теләүчеләр дә күп. Тамчыдан күл җыела диләр бит. Әйдәгез, Әлфия ханымга да кулыбыздан килгәнчә ярдәм кулы сузыйк. 

Фикерләр








Җәмгыять

Пулеметчы Таисия Сабирҗанова: Адым саен миналар куелган хәтәр кырлардан исән кайта алдым

Бөек Ватан сугышында илебез азатлыгы өчен яу кырына китүчеләр арасында гүзәл затларыбыз да бик күп булган. Сугыш афәте аларны да ил азатлыгы хакына аяусыз көрәшкә күтәрелергә, нәфис кулларына корал алырга мәҗбүр иткән. Радист, шәфкать туташы, элемтәче, снайпер, зенитчы кызлар Җиңү көнен якынайтуга саллы өлешен керткән.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла