Фирдүс Тямаев: “Исәнлеге булмаган балалар белән беркем дә реклама ясый алмас иде”

1 Декабря 2017

Укылган: 826 тапкыр

Автор: Эльвира ШАКИРОВА
Фото: Михаил Захаров, Салават Камелетдинов
Казанның ”Уникс” концертлар залында ”Мең рәхмәт” зур хәйрия фестивале узды. Казан хосписына һәм тумыштан артык авырлыктан интегүче, җырлар авторы Ирек Габдрахмановка ярдәм максатыннан оештырылган концертта эстраданың популяр артистлары катнашты.
Тамаша “Голос” проекты финалисты Сәидә Мөхәммәтҗанованың чыгышы белән башланды. Сәидә кечкенәдән ятим балалар йортына йөри икән. Ул үзенең кирәкмәгән уенчыкларын, яңаларын да өстәп, әти-әнисе белән шунда алып бара. Сәидә хәйриячелек белән шөгыльләнүче депутат Фәрит Мифтахов белән дуэт та башкарды. Фәрит әфәнде фикеренчә, мохтаҗларга акчалата гына түгел, изге гамәлләр белән дә ярдәм итәргә кирәк.



“Хәйриячелек – ул киң күңел, изге теләк һәм яхшы гамәлләр. Хәйрия проектлары күп булсын, моның бернинди начарлыгы да юк. Дөньяда төрле хәлле, төрле язмышлы кешеләр бар, моны үз башына төшкән кеше генә аңлый. Әгәр дә без аларга концертларыбыз, җырларыбыз аша ярдәм итә алабыз икән, безнең өчен бу зур шатлык. Шушы Уникс бинасыннан чыгып киткәч тә, изгелек турында онытмасак иде. Шәхсән үземнең кешегә кечкенә генә ярдәмем тисә дә, Аллага шөкер, дип сөенәм. Ярдәм итә алмаган очраклар да бар, бөтен кеше дә миллионер түгел бит”, - дип сөйләде җырчы Асылъяр.

Концертта шулай ук Гүзәлия, Хәким, Филүс Каһиров, Дилә Нигъмәтуллина, Гөлдания Хәйруллина, Илназ Гарипов, Ләйлә Дәүләтова, Лилия Муллагалиева, Рәсим Низамов, Гөлнара Габидуллина, Илшат Вәлиев, Нурзадә, Илнар Ялалов, Әсхәт Дөбер-Шатр, Нурбәк, Ислам Вәлиев катнашты. Хәйрия концертын популяр тандем - Гөлназ Сәфәрова белән Айваз Садыйров алып барды. Аларның һәркайсына “Мең Рәхмәт” фестивале һәм хоспистан Рәхмәт хатлары тапшырылды.


Билгеле булганча, әлеге концертка кадәр кайбер артистлар Казан хосписында дәваланучы балалар янына барып кайтты. Алар арасыда Фирдүс Тямаев та бар иде. Хосписка барганнан соң, Фирдүс интернетка фотолар урнаштырган. Кайбер кешеләр моңа карата тискәре фикер белдергән, янәсе Фирдүс шул рәвешле үзенә реклама ясый.

“Балалар йортыннан фотолар куйгач, минем хакта “үзенә реклама ясый”, дип сөйләделәр. Исәнлеге булмаган, ДЦП белән авыручы балалар белән беркем дә реклама ясый алмас иде дип уйлыйм. Яхшылык эшлисең икән, бу хакта кычкырып сөйләмә, дигән сүз дә бар. Ләкин, киресенчә, без фото һәм видеоларны куябыз. Реклама өчен түгел, тәрбия максаты белән урнаштырабыз. Хосписка багышланган хәйрия концертын зур масштабтагы концертка әверелдерергә кирәк. Анда барып кайтканнан соң, бер атна йоклый алмадым. Чакыруыгызга рәхмәт. Димәк, әле кешенең күңелендә иман, кешеләрнең бер-берсенә карата ышанычы бар. Алдау, ялган, проституция заманасы китте, бернәрсәгә дә ышаныч калмады”, - дип фикерләре белән уртаклашты Фирдүс Тямаев.



Казан хосписында узган очрашуда аның җитәкчесе Владимир Вавилов тагын бер хоспис төзергә планлаштыруын әйткән иде. Аның сүзләренчә, бинаны төзү өчен кимендә 200 млн.сум акча кирәк, ләкин хәзерге вакытта бу сумманың 20 млн.сумы гына җыелган. Хәйрия фестивалендә хосписта дәваланучы балалар һәм анда эшләүче хезмәткәрләр дә бар иде.
“Мең рәхмәт” зур хәйрия фестивале 2014 елдан бирле үткәрелә. Аның оештыручысы – журналист Рөстәм Исхакый. “Мин бүген тамашачы алдында баш иям, чөнки сез булмасагыз, бу чара булмас иде, мохтаҗларга ул кадәр ярдәм итә алмас идек. Бер рәхмәт мең бәладән коткарса, мең рәхмәт безне бәхетле итә ала!” – дип сөйләде Рөстәм Уникс сәхнәсендә.

Шуны да әйтергә кирәк, 12 февральдә Тинчурин театры бинасында әлеге концертның дәвамы көтелә. Анысы Ирек Габдрахманов иҗатына багышланачак. Бүгенге көндә Германиядә яшәүче Ирек Габдрахманов милләттәшләре белән интернет аша аралаша. “Концертта Ландыш Нигъмәтҗанова, Айдар Галимов, Филүс Каһиров, Рәсим Низамов һәм башка популяр артистлар катнашырга мөмкин. Алар да Ирек Габдрахманов җырларын башкара, шуңа күрә әлеге артистлар яшь башкаручылар белән бергә Ирек Габдрахманов концертында булыр дигән ихтимал бар, әлегә сөйләшүләр бара”, - диде Рөстәм Исхакый.

Декабрь аенда “Мең рәхмәт” билетын күрсәткән очракта, 12 февральдәге концертка 30 процентлы ташламалы билет алырга мөмкин.
















Фикерләр








Шоу-бизнес

Дилия Әхмәтшина: “Үзгәреш җиле киләчәккә өмет белән исте”

“Ямьле” төркеме җырчысы Дилия Әхмәтшина “Үзгәреш җиле”ндә катнашты да, шундук Гарәп Әмирлекләренә китеп барды. Ни сәбәпле шулай ашыгыч рәвештә чит илгә китүе турында Дилия Интертатка сөйләде.

Шоу-бизнес

Салават Миңнеханов: “Әпипә” җырының мәгънәсенә төшенергә кирәкми

Быелгы “Үзгәреш җиле”ндә тәүге тапкыр татар эстрадасы артисты Салават Миңнеханов катнашты. “Күпме күзләр күреп онытылган” җыры белән чыгыш ясаган Салават “Үзгәреш җиле” турындагы уй-фикерләрен “Интертат”ка сөйләде.

Шоу-бизнес

“Волга-Волга”дан Антон Салакаев: “Татар телен өйрәнергә мөмкинлек бирмәделәр”

Быел Казанның популяр төркеме «Волга-Волга» оешканга 20 ел тула. Бу төркем үз җырларыннан тыш, танылган җырларны икенче стильдә, ягъни каверлар башкара. Төркемнең репертуарында шулай ук татар җырлары да бар. “Татар-информ” хәбәрчесе “Волга-Волга” төркеме солисты, сәнгать җитәкчесе Антон Салакаев белән күреште. Антон безне төркем оешкан һәм күп еллар дәвамында чыгыш ясаган урыннарга, хәзерге студиясенә алып барды.

БАШКА ЯҢАЛЫКЛАР

Intertat.ru © 2001 - 2017 Әлеге ресурста 12+, 16+, 18+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@intertat.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла