Татарстанда балыкчы боз астына төшеп киткән, аны коткарганнар, ә башкалар гыйбрәт алмаган
Җомга көнне Иделдә, Татарстанның Югары Ослан районы Түбән Ослан һәм Ключищи авыллары арасында, балыкчы боз астына төшеп киткән. Аны коткарганнар.
«Татар-информ»га Россия Гадәттән тыш хәлләр министрлыгының ТР буенча Баш идарәсе хәбәр иткәнчә, ярга килгән коткаручылар баткан ир-ат янына якын бара алмаган, чөнки боз тиз ватыла торган булган.
Батучыга бары тик һава мендәрендәге судно белән генә барып җитәргә мөмкин булган. ГИМС инспекторлары 52 яшьлек ир-атны үлемнән коткарган. Өшегән ир-атны медицина хезмәткәрләренә тапшырганнар.
Шулай да, балыкчылар боз өстеннән китәргә ашыкмый. Шимбә көнне дә Идел бозы тулы кеше иде.