Татар эстрадасы җырчысы Игорь Дмитриев «ТМТВ»да Әбри Хәбриев алып бара торган «10 сорау» тапшыруында кунак булган. Сораулар арасында аның шәхси тормышына кагылышлысы да бар иде. 35 яшьлек буйдак егет ничек бар – шулай сөйләп бирде.
– 35 ел буена ничә хатын-кыз белән «кайнар» мөнәсәбәтләргә кердең?
– Монда җитди мөнәсәбәтләр турында сүз бара инде. Әйдәгез, менә шуннан башлыйк. Ни өчен мин әле өйләнмәгән? Минем гашыйк булып өйләнәсем килә. Мин бу тормышта бер тапкыр гына гашыйк булдым. Ул мине ташлады. Без сөйләштек тә шундый карарга килдек. Минем андый нәтиҗәгә киләсе килмәгән иде. Ул вакытта мин 21 яшьтә идем. Чын мәхәббәт иде!
Аннары 25 яшьтә «гражданский брак»та булдым. 2 ел яшәдек. Без гаилә булдык инде. Аның әти-әнисен бик ярата идем, ул да минем әнине ярата иде. Менә шашып сөйгән 2 очрак.
Хәзер миңа 35 яшь, йөрәгем буш.
– Син аны эзлисеңме? Танышасыңмы, инициатива белдерәсеңме?
– Турыдан эзләмим инде. Иртән торып эзләргә чыгып китмим. Очрашып йөргән кызлар да булды. Хәзер дә кызлар белән аралашам, күзлим. Яшь тә бара, уйларга вакыт.
– Синең яшьтә мин күптән әти идем...
– Бу яшьтә минем әти дә 2 тапкыр әти иде...