Ышанычларын яулаган һәм... – Казанда хатын-кызларны алдаган аферистны тоткарлаганнар

Казанда ким дигәндә 20 хатын-кызны алдаган серияле аферистны тоткарлаганнар. Ул үз корбаннарының 44 миллион сумга якын акчасын үзләштергән. Бу хакта Россия Эчке эшләр министрлыгының рәсми вәкиле Ирина Волк хәбәр итте, дип яза «Комсомольская правда».

Аның сүзләренчә, мошенник схема буенча эш иткән: хатын-кызларның ышанычын яулаган, мәхәббәт һәм тотрыклылык вәгъдә иткән, акчаларын алган, ә аннары юкка чыккан.

Полиция хезмәткәрләре ачыклаганча, моңа кадәр дә хөкем ителгән аферист, хатын-кызлар белән танышканда, үзен эшмәкәр дигән. Имеш, чит ил автомобильләрен сату белән шөгыльләнә. Ышанычларын яулау өчен, потенциаль корбаннарына, мәсәлән, машина ремонтлау яки ипотека алуда ярдәм тәкъдим иткән. Мондый тәкъдимнәр аның корбаннарында кайгыртучанлык һәм ышаныч иллюзиясен тудырган.

Эмоциональ бәйләнеш урнаштырылгач, «эшмәкәр» киләсе этапка күчкән. Ул вакытлыча кыенлыклар турында сөйли башлаган: имеш, аның эшендә көтелмәгән проблемалар туган, һәм хәзер аңа ашыгыч рәвештә финанс ярдәме кирәк. Акчаны, хәтта процентлары белән, тиз арада кайтарырга вәгъдә иткән. Әгәр хатын-кызларның сораулары туа башласа, һәм алар бурычларын кайтаруны сорасалар, ул аларны вәгъдәләр белән «туендырган».

Беренчел мәгълүматлар буенча, ул 44 миллион сумга якын акча урлаган. Ни өчен беренчел? Эш шунда, полициягә әле дә аның корбаннарыннан гаризалар килүен дәвам итә. Шуңа күрә тикшерү зыян күрүчеләр саны, аларга китерелгән зыян суммасы артырга мөмкин булуын кире какмый.

Татарстан Эчке эшләр министрлыгы шикләнелүче гамәлләреннән зыян күргән яки аның җинаять эшчәнлеге турында мәгълүматка ия булган һәркемне Россия Эчке эшләр министрлыгының Казан буенча Эчке эшләр идарәсе тикшерү бүлегенә мөрәҗәгать итәргә чакыра.

Никах аферистына килгәндә исә, аңа карата җинаять эше кузгатылган, һәм ул тикшерү вакытында сак астына, СИЗО камерасына озатылган.