Рамилә Хәйретдинова: «Рамазан үзеңне күрсәтеп, төрле-төрле образлар сайлап йөрү ае түгел»

Соңгы елларда ныгытып дин юлына кереп киткән җырчы Рамилә Хәйретдинова ни өчен бүген Республикакүләм ифтарга бармаячагын сөйләде. Артист «фэшн-ифтар», «бизнес-ифтар» кебек башка халык күп җыела торган мәҗлесләрдән дә баш тарткан икән.

Ифтарлар турында үз фикеремне белдерәсем килә. Республикакүләм ифтарга 2 билетыбыз бар иде. Эштән бирделәр. Мин үземнекен – апага, Рамил – җизнигә бирде. Мин бармыйм, барасым килми. Анда йөрергә бернинди теләгем дә юк.

«Фэшн-ифтар»га да чакырулы идем, анда да, «бизнес-ифтар»га да бармадым. Тагын бик күп төрле дөньви ифтарларга чакырулы идем. Берсенә дә бармадым! Чөнки рамазан аена мөнәсәбәтем башкача. Рамазан ае болай да 30 көн генә. Бик аз вакыт бирелгән безнең өчен. Минем өчен ул – намазлар, Коръән, зикерләр, Тәравих намазлары укып, ничектер файда китерү. Үз-үзеңне күрсәтеп, күлмәкләр киеп, төрле-төрле образлар сайлап, «мин ураза тотам, мин килдем ифтарга» дип мактанып йөрү ае түгел, минемчә.

Мин инде берничә ел шундый фикердә. Мондый әйберне, гомумән, аңламыйм. Ләкин һәркемнең үз фикере. Мин беркемне дә тәнкыйтьләмим, бик матур ифтарлар үтә. Минем дусларым йөри, апам бара, мәсәлән. Үткәрәләр икән, афәриннән башка сүз юк», – дигән Рамилә.